Kigali: Kwiyakira bituma Virusi itera SIDA itaganza umuntu
Ubuzima

Kigali: Kwiyakira bituma Virusi itera SIDA itaganza umuntu

Imvaho Nshya

October 14, 2023

Kwiyakira biri mu bituma umurwayi muri rusange adahungabana cyane ngo aganzwe n’uburwayi. By’umwihariko ku muntu ufite Virusi itera SIDA bimufasha kugira ubuzima butaganzwa na virusi, cyane cyane akurikiza inama agirwa n’abaganga.

Ishyirahamwe nyarwanda ryita ku bantu bafite agakoko gatera Sida no kurwanya ubwandu bushya ANSP+ (Association National de soutien aux personnes vivant avec le VIH/ National Association for supporting People Living with HIV/AIDS) ku bufatanye n’Ikigo cy’Igihugu cy’Ubuzima RBC, ku nkunga ya Global Fund ryateguye ibiganiro by’iminsi ibiri byibanda ku kungurana ibitekerezo kuri VIH/SIDA, ku buzima bw’imyororokere n’ikoreshwa ry’ibiyobyabwenge.

Hasobanuwe ko ku bantu bafite virusi itera SIDA, ikibafasha cya mbere ari ukwiyakira kuko ibindi bishingiraho birimo kwigirira icyizere umuntu ntiyihebe, ntiyiheze, ibyo bigatuma anakurikiza inama agirwa n’abaganga.

Bamwe mu bari bitabiriye ibiganiro batangarije Imvaho Nshya ko kuba umuntu afite virusi itera SIDA bitavuze ko umuntu atagira icyo akora ngo abeho kandi aniteze imbere.

Umwe yagize ati: Kuba umuntu afite virusi itera SIDA ntibivuze ko umuntu yapfa ako kanya kuko ibuye rimeneka urwondo rugisukuma. Icyangombwa ni ukwiyakira, ugakurikirana neza ubuzima bwawe ukurikije inama uhabwa n’abaganga. Ufata neza imiti, ukarya indyo yuzuye ubundi ukirinda ibyasubiza inyuma ubuzima bwawe”.

Umuyobozi w’Ikigo nderabuzima cya Rwampara mu Karere ka Nyarugenge, Mukeshimana Valentine yatangarije Imvaho Nshya ko kwiyakira bifasha usanze afite virusi ya SIDA bituma ataganzwa n’ibyiyumviro byo kwiheba ngo abe yagera no ku gahinda gakabije.

Mukeshimana Valentine uyobora Ikigo nderabuzima cya Rwampara atanga ikiganiro ku myitwariye yafasha ufite virusi itera SIDA

Yagize ati: “Ufite virusi itera SIDA agira ihungabana mu mutwe kubera ko icya mbere muri rusange umuntu atekereza ku uyifite ari uko yaturutse ku gusambana. Akaba ari nayo mpamvu guhungabana kuba gukaze ugereranyije n’izindi ndwara nka diyabete kandi ni yo mbi kuko mu kurya yo bisaba kurobanura.

Icya mbere rero gifasha uwanduye ni ukwiyakira ubundi agakurikiza inama ahabwa kwa muganga, zirimo kwiyitaho, kwigirira icyizere, kutiheba, kutiheza, gufata neza imiti igabanya ubukana bwa virusi itera SIDA, n’ibindi”.

Yongeyeho kandi ko ibiganiro byari bigamije kwita ku kongerera ubumenyi abari mu byiciro bigaragara ko birusha ibindi kuba byakwandura virusi itera SIDA.

Yagize ati: “Ibi biganiro byari ukugira ngo abantu bari mu byiciro birimo abakora uburaya bishobora kuba byakwibasirwa no kwandura virusi itera SIDA, tubyongerere ubumenyi barusheho gukomeza kwirinda no guhugurira bagenzi babo kuva mu buraya kuko bahuriramo n’ingorane nyinshi nko kuba bakanduzwa virusi itera SIDA kimwe n’izindi ndwara zandurira mu mibonano mpuzabitsina gukubitwa, kutishyurwa n’ibindi”.

Abari bitabiriye ibiganiro bakomeje kungurana ubumenyi rusange kuri VIH/SIDA uko yakwirindwa n’izindi ndwara zandurira mu mibonano mpuzabitsina, n’imyitwarire ikwiye kuranga usanze yaranduye.

Ubushakashatsi bwagaragajwe n’Ikigo cy’Ibarurishamibare mu Rwanda mu 2022, bwagaragaje uko imibare y’abafite agakoko gatera SIDA ihagaze, aho Umujyi wa Kigali ari wo wari ufite abantu benshi bafite virusi itera SIDA ufite 4.3%. 

Intara y’Iburengerazuba yari ifite 3.0%, Intara y’Iburasirazuba ifite 2.9%, Intara y’Amajyepfo ifite 2.9% naho Intara y’Amajyaruguru ifite 2.2%.

Ku rwego rw’Igihugu, ikigereranyo cy’abafite virusi itera SIDA ni 3%.

U Rwanda rufite icyerekezo cy’uko mu 2030 nta bwandu bushya buzaba bukigaragara, bitewe nuko abantu bari muri sosiyete bafite virusi itera SIDA bipimisha 95%, muri bo 95% bagafata imiti neza kandi 95% bakaba bagabanya ubukana bwa virusi mu maraso ku buryo yaba itagiteje ibibazo.

Kwiyakira binatuma ufite virusi itera SIDA anywa imiti neza

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA