Komite Olempike y’u Rwanda yasabye bamwe mu banyamuryango  gushaka ubuzimagatozi no kwishyura imisanzu

Komite Olempike y’u Rwanda yasabye bamwe mu banyamuryango  gushaka ubuzimagatozi no kwishyura imisanzu

Imvaho Nshya

March 28, 2022

Bamwe mu banyamuryango badafite ubuzimagatozi ndetse n’abafite ibirarane  by’imisanzu  ntabwo bazemererwa kwitabira Inama y’Inteko Rusange itaha ya Komite Olempike y’u Rwanda.

Iyi ni imwe mu myanzuro yafatiwe mu Nama y’Inteko Rusange  isanzwe ya  Komite Olempike y’u Rwanda “CNOSR” yateraniye i Rubavu muri Hoteli Gorillas ku wa Gatandatu taliki 26 Werurwe 2022.

Ubusanzwe, ishyirahamwe ry’umukino Olempike ritanga umusanzu ungana n’ibihumbi 200 ku mwaka naho iritari Olempike rikishyura ibihumbi 100.

Perezida wa Komite Olempike y’u Rwanda, Uwayo Théogène avuga ko iyi nama iba igomba kuba buri mwaka aho  Abanyamuryango baganira ku bintu bitandukanye birimo kurebera hamwe  ibyakozwe mu mwaka ushize ndetse n’ibigomba gukorwa mu minsi iri imbere bikemezwa.

Perezida wa Komite Olempike y’u Rwanda, Uwayo Théogène

Agaruka ku myanzuro yafashwe ko nta shyirahamwe rizitabira Inama y’Inteko Rusange itaha ridafite ubuzima gatozi ndetse n’irizaba rifite ibirarane by’imisanzu, Uwayo  yavuze ko amashyirahamwe y’imikino  amwe n’amwe akunze kugira ikibazo cy’amikoro  nyuma na  COVID-19 ikaba yarayashegeshe cyane.

Ati : “Bafite ubushake ko iki kibazo kizabonerwa umuti, tukaba twizera ko mu nama itaha bizaba byarahindutse.”

Abanyamuryango ba Komite Olempike y’u Rwanda bamenyeshejwe ko u Rwanda ruzitabira imikino y’ibihugu bikoresha ururimi rw’Icyongereza “Commonwealth Games 2022”  izabera  mu Mujyi wa Birmingham mu Bwongereza taliki 28 Nyakanga kugeza 08 Kanama 2022.

Iyi ni inshuro ya 4 u Rwanda rugiye kwitabira iyi mikino nyuma ya 2010, 2014 na 2018. Muri izi nshuro 3 nta mudali u Rwanda rurabasha kwegukana.

Aha Perezida wa Komite Olempike y’u Rwanda, Uwayo avuga ko umusaruro  abantu babona ujyana n’ibyo baba bashyizemo.

Ati: “Umusaruro tuzazana ungana n’ibyo tuzaba twarashyize mu  gutegura, niba dushaka guhindura umusaruro ni uguhindura uburyo twitegura, nta rindi banga ni inzira igororotse, uburyo dutegura, tubikora gute? Dushyiramo amafatanga angahe? Dukoresha abahe bahanga mu  gutegura abakinnyi, bitegurira hehe? Ibi nitutabihindura umusaruro tuzabona ni uwo mumenyereye, nibinahinduka bizaba ari nk’Imana tuzaba tugize kuko wenda tuzaba duhanganye n’abantu badafite ingufu cyangwa andi mahirwe.”

Iyi Nama y’Inteko Rusange  isanzwe ya  Komite Olempike y’u Rwanda yemeje inyandikomvugo y’inama y’Inteko Rusange yateraniye i Kigali taliki  03 Mata 2021.  Hemejwe kandi  raporo y’ibikorwa bya 2021 na raporo y’umutungo ya 2021.

Muri iyi nama hemejwe  Igenabikorwa ry’igihe kirekire  (2021-2024) na raporo y’abagenzunzi  b’imari “Auditeur Interne ” na “Auditeur Externe “.

Umugenzuzi w’imari wo hanze “Auditeur  Externe” uzagenzura umwaka wa 2022 hemejwe ko azemezwa mu Nama y’Inteko Rusange itaha.

Hemejwe abayobozi ba za Komisiyo zitandukanye. Komisiyo y’abakinnyi n’abagize “National Olympic Academy” bazashyirwaho nyuma.

Inama y’Inteko Rusange ya Komite Olempike y’u Rwanda yemeje ko hagomba gushyirwa imbaraga mu kudaheza abantu  bafite ubumuga muri buri shyirahamwe ry’imikino. Hemejwe ko kandi hajya habaho  inama ihuza  Abanyamabanga Bakuru b’amashyirahamwe y’imikino  ndetse na Komite Olempike ikajya ihura n’abanyamuryango bayo bitarinze guca mu nama y’Inteko Rusange.

Inteko Rusange yemeje ishyirahamwe ry’umukino wa  Netball “Rwanda Netball Organisation” nk’umunyamuryango mushya wa 34.

Frere Rudasingwa  Camille, Perezida w’ ishyirahamwe ry’umukino wa Netball mu Rwanda (iburyo) yakirwa nk’umunyamuryango mushya wa Komite Olempike y’u Rwanda

Hemejwe ko abari bagize itsinda ryateguye imikimo yo kwibuka “ GMT 2021” bakomeza izo nshingano hiyongereyeho Rutiyomba Eustache agasimbura Mbaraga Alexis. Hanemejwe ko kandi muri buri Komisiyo zigize CNOSR hagomba kujya hashyirwamo umuntu uhagarariye siporo y’abantu bafite ubumuga.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA