Koperative zongerewe ubumenyi zisabwa gushyira imbere inyungu rusange
Ubukungu

Koperative zongerewe ubumenyi zisabwa gushyira imbere inyungu rusange

Imvaho Nshya

October 25, 2023

Ubuyobozi bw’Ikigo gishinzwe guteza imbere amakoperative mu Rwanda (RCA), bwasabye abahagarariye amakoperative kumenya inshingano zabo.

Dr Mugenzi Patrice, Umuyobozi Mukuru wa RCA, yibutsa abahagarariye amakoperative ko bagomba kumenya icyo abo bahagarariye bashaka akaba ari cyo bashyira imbere kurusha uko bashyira imbere inyungu zabo bwite.

Yabigarutseho ejo Ku wa Kabiri tariki 24 Ukwakira 2023 ubwo basozaga amahugurwa mu Mujyi wa Kigali y’abayobozi b’amakoperative yo mu Turere twa Gicumbi, Rwamagana na Bugesera, nyuma y’aho umushinga Cooperative Development Program 4 (CD4) ushyirwa mu bikorwa na Land O Lakes ugaterwa inkunga na USAID uhuguye amakoperative 77.

Yagize ati “Abayoboye Koperative n’abakozi bacunga umutungo byose bagomba kubikora mu nyungu z’umunyamuryango ahubwo ntibibe mu nyungu zabo bwite”.

Avuga ko hari aho bimaze kugaragara ko abayobozi b’amakoperative bahora buri gihe baryana ndetse bashwana n’abacungamutungo, byari bikwiye guhagarara bityo buri wese akamenya inshingano ze.

Nshimiyimana Celestin, Perezida wa Koperative Kora Mworozi ikorera mu Murenge wa Mukarange mu Karere Gicumbi, avuga ko yahuguwe ku kwandika neza mu bitabo by’icungamutungo.

Avuga ko iyo bakwigishije bituma umenya inshingano zawe mu miyoborere ku buryo utagongana n’abakozi ushinzwe umutungo. Ku rundi ruhande agaragaza ko nta bumenyi yari afite ku miyoborere ya Koperative.

Yagize ati “Mbere yo guhugurwa twarabikoraga ariko nta bumenyi buhambaye dufite. Amahugurwa twasoje azadufasha mu miyoborere ya Koperative no gucunga neza umutungo wayo”.

Abahagarariye amakoperative basabwe kumenya inshingano zabo

Gahutu Cyprien, Perezida w’Inama y’Ubuyobozi b’Ihuriro ry’Amakoperative y’Aborozi b’inka zitanga umukamo mu Karere ka Gicumbi, na we ahamya ko amahugurwa yabafashije.

Ati “Twakoraga duhuzagurika nta murongo ugenderwaho dufite ariko amahugurwa yaradufashije bituma dutekereza no gukora ibikorwa biteza imbere abanyamuryango”.

Kuva batangira guhugurwa na Land O Lakes biyunguye ubumenyi ku bijyanye n’imiyoborere y’amakoperative. Biteje imbere batangiza iduka ricuruza imiti y’amatungo.

Banakoze umushinga batewemo inkunga na Land O Lakes wo guhinga ubwatsi bw’amatungo bigishirizaho aborozi uko babuhinga n’uko babuhunika.

Nyirigira Willy, ukuriye umushinga CD4 uharanira iterambere ry’amakoperative y’abahinzi n’aborozi mu Rwanda, yabwiye Imvaho Nshya ko mbere yo guhugura Koperative hari ikibazo cy’imiyoborere mibi.

Ati “Dutangira gukorera mu Rwanda twasanze amakoperative menshi afite imiyoborere mibi, aho wasangaga abanyamuryango akenshi bakunda kurengana kubera imitungo yabo idacunzwe neza”.

Agaragaza ko basanze bikunda gupfira mu miyoborere bahitamo guhugura abayobozi ndetse n’abakozi kugira ngo bacunge amakoperative yabo mu buryo bwa kinyamwuga bityo abanyamuryango bahore bunguka aho guhombeshwa n’ubumenyi bw’ababayoboye.

Agira ati “Ikiba kigamijwe cyane ni uko amakoperative akora ubucuruzi bwayo kandi akunguka n’inyungu ikagera ku banyamuryango”.

Nyirigira Willy, ukuriye umushinga CD4 uharanira iterambere ry’amakoperative y’abahinzi n’aborozi mu Rwanda

Ahamya ko mu myaka itanu bamaze bakorana n’amakoperative, yose arungukaga kandi agasagura.

Kugeza ubu ngo amakoperative yose bahuguye ahagaze neza mu bijyanye no kunguka ndetse no gucunga neza inyungu z’abanyamuryango.

Koperative zo muri Rwamagana zahuguwe, ni izihinga ibigori. Izo mu Karere ka Gicumbi ni izorora inka zitanga umukamo, mu gihe izo mu Karere ka Bugesera ari iz’abahinzi b’imboga n’imbuto.

Bahuguraga abayobozi b’amakoperative, abakozi n’abanyamuryango bayo.

Bahugurwaga ku miyoborere myiza, imicungire y’amakoperative, icungamari, icungamutungo ndetse no gushaka isoko n’imari.

Uretse amahugurwa, CD4 yatangaga n’amafaranga ndetse n’ibikoresho amakoperative akeneye kugira ngo abashe kwiteza imbere kandi zikomere bityo zishobore guhangana ku isoko.

Nyirigira, Umuyobozi wa CD4 yavuze ko byasabye imyaka ibiri ngo bahugure abayobozi b’amakoperative kugira ngo bumve inshingano zabo n’aho zigarukira.

Nshimiyimana Celestin, Perezida wa Koperative Kora Mworozi ikorera mu Murenge wa Mukarange mu Karere Gicumbi
Gahutu Cyprien, Perezida w’Inama y’Ubuyobozi b’Ihuriro ry’Amakoperative y’Aborozi b’inka zitanga umukamo mu Karere ka Gicumbi
Dr Mugenzi Patrice, Umuyobozi Mukuru wa RCA

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA