Mu gihe u Rwanda n’Isi muri rusange binjiye mu gihe cyo Kwibuka ku nshuro ya 32 Jenoside yakorewe Abatutsi mu 1994, ibyamamare bitandukanye bagiye bagaragaza ubutumwa buhumuriza abarokotse Jenoside yakorewe Abatutsi.

Tariki 7 Mata buri mwaka, hatangizwa icyumweru cyo Kwibuka Jenoside yakorewe Abatutsi mu 1994 yamaze iminsi 100 aho Abatutsi basaga Miliyoni bishwe bazizwa uko bavutse ndetse ikanasiga imfubyi, abapfakazi n’abafite ibikomere batewe n’ihohoterwa bakorewe icyo gihe.

Bifashishije imbuga nkoranyambaga zabo ibyamamare barimo abapasiteri, umusizi Rumaga n’abandi baba mu myidagaduro batanze ubutumwa bwo guhumuriza abarokotse Jenoside yakorewe Abatutsi mu 1994.

Umushumba Mukuru wa Authentic Word Ministries na Zion Temple Celebration Center, Apôtre Dr. Paul Gitwaza, yageneye ubutumwa Abarokotse Jenoside yakorewe Abatutsi abasaba gukomeza gutwaza gitwari anagaragaza ko mu myaka 32 ishize Jenoside yakorewe Abatutsi ihagaritswe, u Rwanda rumaze kugerwaho n’ibikorwa byinshi byiza by’Imana.

Yanditse ati: “Amahoro y’Imana abane namwe mwese. Jyewe n’umuryango wanjye n’amatorero yose ya Zion Temple Celebration Center twongeye kwifatanya n’Abanyarwanda muri iki gihe twibuka ku nshuro ya 32 Jenoside yakorewe Abatutsi mu 1994.”

Akomeza agira ati: “Iki gihe cyo kwibuka no kuzirikana amateka mabi u Rwanda rwaciyemo kiremerera imitima ya benshi, cyane cyane abarokotse Jenoside. Uko imyaka itambuka haracyari ibikomere n’agahinda. Uyu munsi nifuzaga kuguhumuriza wowe ugifite intimba no kongera kukubwira nti Komera, haracyari ibyiringiro kandi umugambi w’Imana ku buzima bwawe ni umugambi mwiza.”

Abandi barimo umunyamideri Kabano Franco wibukije urubyiruko ko rufite inshingano bahawe n’amateka y’u Rwanda kandi bakaba bagomba kurinda ukuri kwayo. Ati: “Ku rubyiruko mu gihe twibuka abacu bishwe muri Jenoside yakorewe Abatutsi, dufite inshingano twahawe zo kurinda ukuri kw’amateka y’Igihugu ku bitugu byacu, kwanga ivangura, no kubaka u Rwanda rurangwa n’ubumwe n’ubumuntu.”

Uburibwe bw’amateka butwibutsa impamvu urukundo rukwiye kuganza kurusha urwango, ubumwe bugomba kwimakazwa kurusha ivangura n’impamvu Kwibuka bigomba kuyobora ejo hacu hazaza, twibuke abacu duhagarara ku kuri n’amahoro twubaka Igihugu gitera imbere umunsi ku wundi.”

Umusizi Rumaga yagaragaje ko Kwibuka ari igikorwa cyo kuzirikana ibihe Abatutsi bishwe muri Jenoside bagiranye n’imiryango yabo basize kandi bazahora bazirikanwa. Ati: “Izina ni ukubibuka ariko mfura nzima ntabwo twigeze tubibagirwa ni uko nyuma y’imyaka 32, uyu munsi uku kwezi aya matariki ari bwo duherukana, ineza yanyu izahora itwizihiye nk’ikirezi. U Rwanda rw’ubumwe ni icyomoro cy’urwo mwishwe.”

Umubyinnyi w’imbyino zigezweho Divine Uwayezu uzwi cyane nka ‘Divine Uwa’ yanditse ko kuri we kubyina birenze kuba impano ahubwo ari uburyo akoresha nko gukabya inzozi abagiye bakiri bato batakabije.

Yanditse ati: “Turibuka inzirakarengane zishwe batageze ku nzozi zabo, imiryango yatatanyijwe, turibuka imbaraga z’igihugu cyahisemo kongera kwiyubaka cyikarabagirana no kubabarira batibagiwe. Nk’umubyinnyi umubiri wanjye wabaye ijwi aho amagambo gusa yari atagihagije, twese hamwe turinde ukuri kw’amateka yacu, kubera ko kwibuka atari ukwibuka gusa ibyahise ahubwo ni inshingano zo kubaka ejo hazaza. Twibuke twiyubaka.”

Aba bahanzi n’ibyamamare batanze ubutumwa buhumuriza abarokotse Jenoside yakorewe Abatutsi mu 1994 banagaragaza ko urubyiruko rukwiye kumenya amateka no kuyazirikana kugira ngo barinde ahazaza h’Igihugu no kumenyekanisha ukuri kw’amateka.

Ba uwa mbere mu kumenya amakuru agezweho!!!