Ikipe y’igihugu ya Madagascar n’iya Maroc zageze ku mukino wa nyuma Shampiyona Nyafurika ihuza abakina imbere mu bihugu byabo (CHAN 2024) iri gukinwa ku nshuro ya munani. 

Ku wa Kabiri tariki ya 26 Kanama 2025, ni bwo hakinwe imikino ya ½ cy’irangiza yabereye muri Uganda na Tanzania.

Ku kibuga Benjamin Mkapa National Stadium i Dar es Salaam, muri Tanzania, Ikipe y’igihugu ya Madagascar y’abakinnyi 10 yatsinze iya Sudani igitego 1-0 hitabajwe iminota 30 y’inyongera kuko amakipe yombi yari yanganyije ubusa ku busa mu minota 90. 

Nyuma yo gusinda  Sudani, Masagascar yabonye itike yo gukina umukino wa nyuma ku nshuro ya mbere mu mateka yayo. 

Iminota 90 isanzwe yari yarangiye ari ubusa ku busa, ndetse Madagascar yakinaga ari abakinnyi 10 mu kibuga nyuma y’uko Fenohasina Razafimaro yahawe ikarita itukura ku munota wa 79 akoze ikosa rya kabiri rihanishwa ikarita y’umuhondo.

Byasabye gutegereza umunota wa 116, Toky Rakotondraibe atsinda igitego kitazibagirana mu mateka y’umupira w’amaguru wa Madagascar.

Undi mukino wa 1/2 wabereye Kuri Mandela National Stadium hagati ya Morocco na Senegal ifite igikombe giheruka warangiye ikipe yo mu Majyaruguru ya Afurika itsinze Sénégal penaliti 5-3 nyuma yo kunganya igitego 1-1 mu minota 120. 

Maroc yinjije penaliti zayo zose zatewe na Mohamed Hrimat, Oussama Lamlioui, Ayoub Khairi, Anas Bach na Youssef Mehri naho Sénégal ihusha imwe yatewe na Seyni Mbaye Ndiaye igafata umutambiko w’izamu.

Ni mu gihe Vieux Cissé, Baye Ciss na Daouda Ba bari batsinze penaliti eshatu zabanje ku ruhande rwa Sénégal.

Umukino wa nyuma hagati y’impande zombi uteganyijwe ku wa Gatandatu tariki ya 30 Kanama 2025, kuri Kasarani Stadium iherereye i Nairobi muri Kenya.

Mbere y’aho ku wa Gatanu, tariki ya 29 Kanama, Senegal na Sudani bazahurira mu mukino wo guhatanira umwanya wa gatatu uzabera kuri Mandela National Stadium muri Uganda.