Manchester City yatsinze Manchester United ibitego 3-0, yongera kubona itsinzi muri Shampiyona y’u Bwongereza.

Ni umukino w’Umunsi wa Kane wa Shampiyona y’u Bwongereza wabereye kuri Etihad Stadium kuri iki Cyumweru tariki ya 14 Nzeri 2025.

Kera kabaye Rutahizamu Benjamin Sesko wa Manchester United yari yabanje mu kibuga. Ku rundi ruhande Umunyezamu Gigio Donnarumma uherutse kugurwa na Manchester City na we yabanje mu kibuga.

Umukino watangiye wihuta uryoheye ijisho ku mpande zombi buri kipe isatira izamu.

Ku munota wa 17’ Manchester City yari mu rugo yafunguye amazamu ku mupira wahinduwe na Jeremy Doku mu rubuga rw’amahina usanga Phil Foden wari uhagaze wenyine ashyiraho umutwe ujya mu rushundura.

Nyuma yo gutsindwa Manchester United yinjiye mu mukino itangira gushaka igitego kwishyura binyuze ku ruhande rwa Bryan Mbeumo ariko ubwugarizi bwa Manchester City n’umuzamu Donnarumma bakomeza guhagarara neza.

Igice cya mbere cyarangiye Manchester City yatsinze Manchester United igitego 1-0.

Manchester City yakomeje gukina neza mu gice cya kabiri bidatsinze ku munota wa 52’ yabonye igitego cya kabiri ku mupira mwiza Jeremy Doku yahaye Rutahizamu Erling Haaland aroba umunyezamu ujya mu izamu.

Nyuma y’umunota umwe Man City yashoboraga kubona igitego cya gatatu ku mupira watajwe na Manchester United ufatwa na Doku awuha Haaland ateye mwiza ukurwamo n’igiti cy’izamu.

Ku munota wa 60’ Manchester United yashoboraga kubona igitego cyo kwishyura ku ishoti rikomeye ryatewe na Bryan Mbeumo umupira ukurwamo n’Umunyezamu Gigio Donnarumma awushyira muri Koruneri itagize icyo itanga.

Ku munota wa 68’ Manchester City yatsinze igitego cya gatatu ku mupira Bernardo Silva yacomekeye Erling Haaland asiga ba myugariro ba Manchester United awushyira mu izamu.

Umukino warangiye Manchester City yatsinze Manchester United ibitego 3-0, yongera kubona itsinzi nyuma y’imikino ibiri yikurikiranya idatsinda ifata umwanya wa munani n’amanota atandatu.

Ni mugihe Manchester United yatsinzwe umukino wa Kabiri muri ine imaze aho ifite itsinzi imwe gusa.

Undi mukino wabaye kuri iki Cyumweru, Bigoranye cyane, igitego kimwe cya Mohammed Salah kuri Penaliti cyafashije Liverpool gutsinda Burnely igitego 1-0 ikomeza kuyobora Shampiyona n’amanota 12.