Ikipe ya Manchester City yegukanye Igikombe cya Shampiyona y’u Bwongereza ku nshuro ya kane  yikurikiranya nyuma gutsinda West Ham United ibitego 3-1 mu mukino usoza shampiyona, wabaye kuri iki Cyumweru.

Kuri iki Cyumweru tariki 19 Gicurasi 2024 ni bwo hakinwe imikino ya nyuma ya Premier League hasozwa umwaka w’imikino wa 2023-2024.

Muri uyu mwaka byasabye kugera ku munsi wa nyuma hataramenyekana uwegukana igikombe hagati Manchester Vity na Arsenal , Manchester City yari ifite amanota 88 ku mwanya wa mbere, irusha abiri Arsenal ya kabiri.

Ku kibuga Etihad Stadium Manchester City yari yakiriye Westham United mu mukino yasabwaga gutsinda ngo yegukane igikombe cya Shampiyona.

Ni umukino Man City yatangiranye igitego kuko ku munota wa kabiri gusa, Phil Foden uherutse guhembwa nk’umukinnyi w’umwaka yateye ishoti rikomeye ari hanze y’urubuga rw’amahina atsinda igitego cya mbere.

Bidatinze, Foden yatsinze igitego cya kabiri ku munota wa 19, ku mupira mwiza yahawe na Rodri, undi ntiyamutenguha yongera guhindukiza umunyezamu Alphonse Areola.

Mu minota 35, West Ham yatangiye kwinjira mu mukino no kugera imbere y’izamu rya Stefan Ortega, ku munota wa 42, Mohammed Kudus yishyuye igitego cya mbere, ku mupira wavuye muri koruneri awukina yigaramye.

Igice cya mbere cyarangiye Manchester City iyoboye umukino n’ibitego 2-1.

Ikipe y’i Manchester yongeye gutangirana imbaraga igice cya kabiri irasitara bikomeye. 

Ku munota wa 59, Rodri yatsinze igitego cya gatatu ku mupira mwiza yahawe na Bernardo Silva, atera ishoti rigendera hasi, Areola ntiyabasha kurihagarika.

Mu minota 70, umukino watuje utangira gukinwa cyane mu kibuga hagati ari nako Man City ikomeza kwiharira umupira cyane.

Mu minota ya nyuma, West Ham yagerageje gusatira ndetse iza no kubona igitego cya kabiri ku munota wa 87 cyatsinzwe na Tomáš Souček ariko umusifuzi aracyanga avuga ko yagitsindishije akaboko.

Umukino warangiye Manchester City itsinze West Ham United ibitego 3-1, yegukana Igikombe cya Shampiyona y’u Bwongereza (Premier League) ku nshuro ya kane yikurikiranya, ikaba iya cyenda muri rusange.

City yegukanye igikombe cy’uyu mwaka w’imikino ifite amanota 91, irusha abiri Arsenal yatsinze Everton 2-1.

Erling Haaland ukinira Manchester City niwe wasoje umwaka w’imikino ari we watsinze ibitego byinshi (27), ikaba ari inshuro ya kabiri yikurikiranya uyoboye abandi muri iyi shampiyona.

Uretse gutwara iki gikombe, Manchester City kandi ifite amahirwe yo kwegukana FA Cup [Izahura na [Manchester United] tariki 25 Gicurasi 2024 I Wembely.

Ku rundi ruhande, Arsenal yakinaga ireba uko i Manchester bihagaze yabuze igikombe ku munota wa nyuma nubwo yatsinze Everton ibitego 2-1.

Indi mikino yabaye uyu munsi, Liverpool yatsinze Wolverhampton ibitego 2-0, mu mukino wa nyuma w’umutoza Jürgen Klopp wari umaze imyaka icyenda muri iyi kipe.

Manchester United yatsinze Brighton & Hove Albion ibitego 2-0, Chelsea na yo yitwara neza imbere ya Bournemouth iyitsinda ibitego 2-1.

Amakipe atatu ya nyuma yamanutse mu Cyiciro cya Kabiri ni Luton Town, Burnley na Sheffield United.