Minisitiri Dr Bizimana yanenze abaganga bishoye muri Jenoside yakorewe Abatutsi
Politiki

Minisitiri Dr Bizimana yanenze abaganga bishoye muri Jenoside yakorewe Abatutsi

Imvaho Nshya

July 13, 2023

Dr Bizimana Jean Damascène, Minisitiri w’Ubumwe bw’Abanyarwanda n’Inshingano mboneragihu (MINUBUMWE), yatangaje ko hari bamwe mu baganga bagize uruhare muri Jenoside yakorewe Abatutsi mu 1994, asaba abiga ubuvuzi kurengera ubuzima bw’Abanyarwanda.

Yabigarutseho ejo ku wa Gatatu taliki 12 Nyakanga 2023, mu kiganiro yahaye abanyeshuri bo muri kaminuza ya ‘University of Global Health Equity’ iherereye mu Karere ka Burera mu Ntara y’Amajyaruguru.

Yagarutse ku mateka y’u Rwanda, imiterere y’ingengabitekerezo ya Jenoside n’ingamba zo kubaka igihugu.

Nk’abanyeshuri biga muri kaminuza ngo ni ngombwa ko bakurikira kandi bakamenya iby’ingenzi by’aya mateka.

Minisitiri Dr Bizimana yavuze ko igihugu cyashenywe n’abari barize nkabo, baranyuze muri kaminuza, babona imyanya ya politiki, mu nzego za gisirikare, abo ngo aba ari bo bategura kwica abaturage.

Yagize ati “Ingengabitekerezo bagendeyeho bayigishijwe ari batoya bangana namwe, barayikurana kugeza bayishyize mu bikorwa”.

Yagaragaje ko Abanyarwanda batigeze bagira umuco wo kwica muri kamere yabo, ahubwo babitojwe n’abakoloni b’Ababiligi ndetse n’Abamisiyoneri babibye ingengabitekerezo y’urwango.

Ati “U Rwanda cyari igihugu kibayeho neza hanyuma kiza kugira igihe gisenywa.

Ingengabitekerezo y’urwango, ivangura, irondabwoko ryazanywe n’abanyamahanga baba ari bo barishyira mu banyarwanda tugira ibyago Abanyarwanda barabyakira babishyira mu mitegekere y’igihugu”.

Ku rundi ruhande, yasobanuye ko mu muco nyarwanda, mu buzima bwa buri munsi, Abanyarwanda baha agaciro ubuzima, ni ryo hame rya mbere baha agaciro.

Kongera kubaka ubuzima bwa buri munyarwanda ni wo muco.

Ati “Iyi ndangagaciro ibarange, abanyamahanga, ababigisha, abo mwigana nabo mubashyiremo uwo muco wo kubaha ubuzima mubereke ko nubwo dufite igihugu cyabayemo aya mateka mabi cyane, amateka ya Jenoside ariko si wo muco wacu.

Si wo muco nyarwanda, wazanywe n’abantu babi barimo abakoloni, abamisiyoneri na bamwe mu banyarwanda barabakira.

Abigishije urwango baraduhemukiye cyane kuko batumye urwango rwinjira mu byiciro byose, abanyarwanda bamwe bica abandi, abapadiri bavuyemo abicanyi, abaganga bashinzwe gutanga ubuzima ariko hari abaganga bishe abarwayi”.

Yasabye abanyeshuri biga amasomo y’ubuganga muri iyi kaminuza, guharanira kuba abaganga barengera ubuzima kugira ngo batandukane n’umurage mubi w’abaganga bahemukiye u Rwanda.

Yababwiye ko ibitaro byinshi cyane mu Rwanda byiciwemo abarwayi kandi bikozwe na bamwe mu banyarwanda.

Ati “[…] bakabavanamo za serumu bakabica, kubera iki kubera kubigisha urwango.

Mwebwe mufite umukoro ukomeye wo guhindura iyo mikorere, wo kuba abaganga koko barengera ubuzima.

Mufite bakuru banyu, basaza banyu ndavuga abo baganga bakuru babanjirije bafite urugero rubi cyane.

Mwebwe rero uburyo bwiza bwo kubaka igihugu ni ukwiga neza, mukaba abaganga b’abahanga kandi mukaba abaganga barengera ubuzima bw’Abanyarwanda bose”.

MINUBUMWE yasabye abanyeshuri biga ubuvuzi muri ‘University of Global Health Equity’ ko bakwiye kumenya ko mu mateka habayeho inzobere, abahanga mu bwenge ariko ubungubu bacirwa imanza kubera Jenoside kandi bari bashinzwe kuvura.

Yagize ati “Mwebwe mu mikorere yanyu, mu masomo yanyu mwiga, mutange urugero, mube abahanga mu bwenge, muzabe n’abahanga mu mikorere no myitwarire mutandukane n’uyu murage mubi aba bategetsi babi baturaze”.

Minisitiri Dr Bizimana yasabye abanyeshuri kugira uruhare mu ikoreshwa ry’imbuga nkoranyambaga baharanira ishema ry’u Rwanda no kurwanya abasenya ibyo u Rwanda rumaze kubaka mu myaka 29 ishize Jenoside yakorewe Abatutsi ihagaritswe.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA