Miss w’u Rwanda 2022, Nshuti Divine Muheto, ukurikiranyweho icyaha cyo kunywa inzoga zirengeje igipimo agatwara imodoka atabifitiye uruhushya, dosiye ye yamaze gushyikirizwa urukiko akaba azaburana ku munsi w’ejo ku wa Kane tariki ya 31 Ukwakira 2024 ku Rukiko rw’Ibanze rwa Kicukiro.

Ku mugoroba w’ejo hashize ku wa 29 Ukwakira ni bwo Polisi y’u Rwanda ibinyujije ku rubuga rwa X yatangaje ko Miss Muheto Divine yafashwe kubera gutwara ikinyabiziga yanyoye ibisindisha birengeje igipimo, kandi nta ruhushya rwo gutwara agira, akagonga ndetse akanangiza ibikorwa remezo nyuma akaza guhunga.

Miss Muheto ibi byaha si ubwa mbere yabikora kuko yigeze gukora indi mpanuka yanamuteye ibikomere aho nabwo bivugwa ko yari yasinze. 

Mu gitabo cy’amategeko agenga imikoreshereze y’umuhanda   mu ngingo igena amabwiriza agenga imihanda n’uburyo bwo kuyigendamo, mu kiciro cya 3 kivuga ku  gutwara icyinyabiziga wasinze; ingingo ya 10 ivuga ko  uhamwe n’icyaha ahanishwa igifungo kuva ku minsi irindwi kugeza ku mezi atandatu.

Mu kiciro cya 4 ku ngingo ya 15 ivuga ku byerekeye icyaha cyo guhunga umaze gutera cyangwa guteza impanuka ivuga ko umuntu wese yaba atwaye ikinyabiziga cyangwa atagitwaye, uhunga kugira ngo badashobora kumenya ibyabaye, kandi azi ko icyo kinyabiziga cyangwa we bwite yakoze cyangwa yateje impanuka ahantu hagendwa, ahanishwa igifungo kuva ku mezi atatu kugeza k’umwaka.