Nyuma y’akaruhuko k’imikino y’amakipe y’ibihugu mu bihugu bitandukanye imikino ya Shampiyona yarakomeje mu mpera z’icyumweru gishize, bamwe mu bakinnyi b’Abanyarwanda bakomeje gufasha amakipe yabo kwitwara neza, n’ubwo hari abo umusaruro ukomeje kubura.

Imvaho Nshya igiye kubagezaho uko bamwe muri bo bitwaye mu mpera z’icyumweru, baba abakina muri Afurika cyangwa hanze yayo.

Impera z’Icyumweru zari nziza kuri Mugisha Bonheur ukinira Masry yo mu Misiri nyuma yo gutsinda igitego kimwe mu ikipe ye yatsinzemo Kaizer Chiefs yo muri Afurika y’Epfo ibitego 2-1 mu mukino wa mbere wo mu itsinda rya CAF Confederation Cup.

Uyu Munyarwanda ukina hagati yugarira ni we wafunguye amazamu ku munota wa 59 ku gitego yatsinze kuri Penaliti ndetse yakinnye umukino wose.

Myugariro Buregeya Prince yakinnye umukino wose, ikipe ya Nairobi United yo muri Kenya itsindwa na Wydad Casablanca yo muri Maroc ibitego 3-0 mu mikino wa mbere wo mu itsinda B rya CAF Confederation Cup.

Ishimwe Anicet ukina nka rutahizamu unyuze mu mpande muri Olympique Beja yo mu Cyiciro cya mbere Tunisia yinjiye mu kibuga asimbuye 64 mu mukino w’Umunsi wa 15 wa Shampiyona batsinzwemo na Club African igitego 1-0.

Muri iyi Shampiyona kandi ni ho rutahizamu Nshuti Innocent akina muri Espérance Sportive de Zarzis. Uyu Munyarwanda ntiyakinnye yitabajwe mu mukino ikipe ye yatsinzemo CA Bizertin ibitego 3-0.

Zire FK ikinamo Mutsinzi Ange muri Azerbaijan yatsinze Qabala igitego 1-0, mu mukino w’Umunsi wa 12 wa Shampiyona y’icyiciro cya mbere. Uyu myugariro ntiyakinnye yitabajwe muri uyu mukino.

Hakim Sahabo ukina muri Standard de Liège iri mu cyiciro cya mbere mu Bubiligi, yinjiye mu kibuga asimbuye ku munota 46 mu mukino w’umunsi wa 15 wa Shampiyona banganyijemo na Zulte waregem ubusa ku busa.

RAAL La Louvière na yo ikina muri iyi Shampiyona yatsinzwe na Anderlecht igitego 1-0, mu mukino Umunyarwanda Samuel Gueulette atakinnye nubwo yari ku ntebe y’abasimbura.

Myugariro Emmanuel Imanishimwe ukinira AEL Limassol yo mu cyiciro cya mbere muri Cyrus yasimbuwe ku munota wa 79 , mu mukino ikipe ye yatsinzemo APOEL Nicosia ibitego 2-1 mu mukino w’umunsi wa 11 wa Shampiyona, ifata umwanya wa karindwi n’amanota 16.

Jamus SC yo mu cyiciro cya mbere muri Sudani y’Epfo ikinamo Muhire Kevin yanyagiye Simba SC Juba ibitego 8-1 mu mukino wa gishuti. Muhire wari waragize imvune ntiyakinnye uyu mukino ariko yatangiye gukora imyitozo.

Al Ahly Tripoli yo muri Libya ikinamo Manzi Thierry na Bizimana Djihad iri kwitegura umukino wa gishuti uyihuza na Al-Shorouk, kuri uyu wa Mbere, tariki ya 24 Ugushyingo 2025.

Biramahire Abeddy yari ku ntebe y’abasimbura ubwo ES Setif akinirayo mu cyiciro cya mbere muri Algeria yanganyaga na Oran 0-0 mu mukino w’umunsi wa 12 wa Shampiyona.

Ba uwa mbere mu kumenya amakuru agezweho!!!