Madamu Jeannette Kagame akaba n’Umukuru w’Umuryango Unity Club Intwararumuri yavuze ko nubwo u Rwanda rumaze gutera intambwe mu kwimakaza gahunda ya Ndi Umunyarwanda, Abanyarwanda badakwiye kwirara ahubwo ko ari umwanya mwiza wo gushyira imbaraga mu kurandura icyasenya ubumwe bw’Abanyarwanda.

Yabigarutseho i Kigali kuri uyu wa Gatandatu tariki ya 16 Ugushyingo 2024, mu ijambo yagejeje ku bitabiriye Inama ya 17 y’Ihuriro ry’Umuryango Unity Club Intwararumuri.

Ni inama yitabiriwe n’Abayobozi bakuru mu nzego zitandukanye z’Igihugu, Abanyamadini n’Amatorero n’Urubyiruko n’abandi, bunguranaga ibitekerezo ku mateka n’imiyoberere yaranze u Rwanda hagamijwe kubikuramo amasomo yubaka Igihugu.

Madamu Jeannette Kagame mu ijambo yagejeje kuri iryo huriro, yavuze ko iyo utekereje aho u Rwanda rwavuye nyuma ya Jenoside yakorewe Abatutsi mu 1994, ntawari uzi ko byakunda ko gushyiraho Unity Club yashinzwe mu 1996 ariko byagezweho ku buryo bushimishije.

Yavuze ko u Rwanda rumaze imyaka 30 rwubaka imiyoborere n’iterambere nk’uko ibipimo bitandukanye bibigaragaza ko bigeze ahashimishije.

Yagize ati: “Kongera gusubiza u Rwanda umwimerere warwo no kwimakaza ubunyarwanda n’ubumwe no kurandura burundu iturufu y’amacakubiri byari ngombwa kuko yaratwononeye bikabije.”

Yibukije ko nk’intwararumuri habayeho kwimakaza gahunda ya Ndi Umunyarwanda kandi ikaba yarakwiye mu gihugu hose.

Yagize ati: “Hari abibaza ngo Ndi Umunyarwanda yahawe umwanya uhagije, bati ubu ntihageze ngo hashyirweho umwanya wo gutekereza ku bindi? Nubwo tumaze gutera intambwe haracyari ibyo tugomba gushyiramo imbaraga kurushaho.”

Uyu mwaka insanganyamatsiko y’Ihuriro rya 17 rya Unity Club Intwararumuri, igira iti: “Ndi Umunyarwanda igitekerezo ngenga cy’ukubaho kwacu.”

Madamu Jeannette Kagame yibukije ko ubumwe bw’Abanyarwanda ari ingabo ikingira icyatanya Abanyarwanda.

Ati: “Tutazirara tukibagirwa ko uwabibye ingengabitekerezo ya Jenoside akanayishyira mu bikorwa, yarekeye aho. Abifuriza u Rwanda inabi baracyari benshi, baba Abanyamahanga n’Abanyarwanda ubwabo bagifite imyumvire mibi yo gusenya Igihugu cyacu”.

Icyakora Madamu Jeannette Kagame yavuze ko nubwo hari abo badashakira ineza u Rwanda bahari, ntawe bakwiye gutera ubwoba kuko Igihugu cyiyubatse kandi bari bahari, ashimangira ko umutima w’Abanyarwanda bakunda u Rwanda watumye badacika intege.

Muri iri huriro rya Unity Club Intwararumuri hanabaye inteko rusange y’Abanyamuryango bayo, aho banakiriye Abanyamurwango bashya 19.

Umuryango Unity Club Intwararumuri, watangijwe na Madamu Jeannette Kagame, ugamije gutanga umusanzu mu kubaka ubumwe bw’Abanyarwanda, ugizwe b’abayobozi bari muri Guverinoma n’abayihozemo n’abo bashakanye.

Ni Umuryango, kuri ubu ubarizwamo abanyamuryango 332, washinzwe muri Gashyantare 1996, wiha intego yo kwimakaza umuco w’ubumwe n’amahoro, byo nkingi z’iterambere rirambye.