Ubuyobozi bw’Ikigo Gishinzwe Amazi, Isuku n’Isukura (WASAC Group) butangaza ko mu Karere ka Ngoma huzuye uruganda rw’amazi, ruyageza ku baturage barenga ibihumbi 340.

Uru ruganda rwubatse ku nkengero z’ikiyaga cya Mugesera mu murenge wa Zaza, rufite ubushobozi bwo gutunganya amazi angana na meterokibe ibihumbi 11 ku munsi. Rugeza amazi mu mirenge 9 yo mu Karere ka Ngoma irimo: Zaza, Karembo, Sake, Jarama, Rukumberi, Kibungo, Kazo, Mugesera na Remera.

Uru ruganda rwubatswe mu mushinga wo kubaka umuyoboro wiswe ‘Sake Water Supply Sytem’. Uretse uru ruganda, hubatswe imiyoboro y’amazi ireshya na kilometero 149, ibigega bibika amazi n’amavomo rusange 17 mu rwego rwo kwegereza abaturage amazi.

Bamwe mu baganiriye na Imvaho Nshya, bishimira ko WASAC Group yabahaye amazi meza bakaba batakijya kuvoma amazi yo mu Kiyaga cya Mugesera.

Uwitwa Olive Musengimana utuye mu Murenge wa Zaza, agira ati: “Mu Mudugudu w’Igifureri mu Kagari ka Nyagasozi tumeze neza nta kibazo cy’amazi dufite.”

Mbere tutarabona amazi, twajyaga kuvoma mu ruzi ukazamuka wananiwe ariko ubungubu amazi arahari nta kibazo.”

Bavomaga kure kuko ngo bakoraga urugendo rw’isaha, mu gihe ubu bakora urw’iminota mike kuko ngo mu minota 30 baba batetse banariye kubera ko bafite amazi hafi.

Musengimana akomeza agira ati: “Ubwo twanywaga amazi mabi, tugakaraba amazi mabi, twagiraga ikibazo kuko bamwe barwazaga amavunja kubera kubura uko bakaraba, banywa ayo mazi mabi bakarwara inzoka ariko ibyo ntibikibaho kuko dusigaye tunywa amazi meza.”

Imvaho Nshya yasanze umugabo wavomaga kuri robine bavomaho amazi aturuka mu ruganda rwa Sake, ashimangira ko mbere batarabona amazi bari bafite ikibazo gikomeye cy’amazi.

Ati: “Mbere tutarabona aya mazi twavomaga amazi y’ikiyaga, yabaga asa nabi kenshi akadutera indwara.”

Akomeza agira ati:” Aho tuboneye amazi meza nta bibazo by’uburwayi bw’inzoka tugihura na byo kuko amazi yacu ni meza, arahendutse kuko ijerekani tuyigura igiceri cya 20 ndetse ntajya abura.”

Uwitwa Mukakamana Madeleine we ahamya ko abana bajyaga kuvoma ku kiyaga, batinda ababyeyi bakabakubita kandi hari kure, ariko ubu ngo bagera ku muhanda bakazana amazi meza mu gihe gito umwana akajya ku ishuri adakererewe.

Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, avuga ko uruganda rw’amazi rwubatswe na WASAC Group rwahinduye imibereho y’abaturage.

Ati: “Mu baturage 404 000 dufite mu karere ka Ngoma, nibura 320 000 bamaze kubona kuri ayo mazi y’uruganda.”

Ubuyobozi bw’Akarere buvuga ko igice cya Kabiri cy’uyu mushinga kizaza kiziba icyuho cy’amazi gihari muri gahunda ya NST2 yuko buri munyarwanda wese azaba afite amazi meza nibura muri metero 500 mu cyaro.

Faustin Nsengiyumva, Umuyobozi w’Ishami rishinzwe imishinga muri WASAC Group, yabwiye Imvaho Nshya ko icyiciro cya Kabiri cy’umushinga kizibanda ku kwagura imiyoboro ku buryo amazi uruganda rutunganya agera ku baturage uko bikwiye, buri muturage wese ayabona.”

Uyu muyobozi asaba abaturage gufata neza ibikorwaremezo by’amazi bagenda begerezwa.

Mapambano Nyiridandi Cyriaque, Umuyobozi wa Ngoma wungirije ushinzwe iterambere ry’ubukungu, agaragaza ko abaturage bagerwaho n’amazi meza mu Karere ka Ngoma bageze kuri 87%.

Umushinga ‘Construction of Sake water supply System’ washyizwe mu bikorwa na WASAC Group ku nguzanyo ya Banki Nyafurika Itsura Amajyambere (AfDB) ingana na miliyari 16.3 Frw. Imirimo yatangiye muri Gashyantare 2023 irangira muri Gicurasi 2025.

Amafoto: Olivier Tuyisenge

Ba uwa mbere mu kumenya amakuru agezweho!!!