Umuraperi Nicki Minaj yajyanywe mu rukiko na Sosiyete yitwa 24/7 Productions, imushinja kuyambura ibihumbi 275 by’amadolari ya Amerika.

Ni amafaranga bavuga ko bahaye uwo muhanzi w’ikirangirire kugira ngo ayifashishe mu bijyanye no gutegura no gutunganya ibikorwa by’ibitaramo bibiri yakoze.

Ikinyamakuru cya TMZ cyatangaje ko gifite inyandiko z’urukiko zigaragaza ko Nicki Minaj yarezwe binyuze muri sosiyete ye yitwa Pink Friday Productions.

Uwo muraperi, akaba ashinjwa gukorana na 24/7 Productions bwa mbere mu mwaka wa 2022 mu bihembo bya MTV Video Music Awards.

TMZ ikomeza ivuga ko mu mpapuro zashyikirijwe urukiko, iyo sosiyete yerekanye ko yafashije Nicky Minaj serivisi zo gutambutsa amashusho ubwo yari ari ku rubyiniro mu buryo bw’imbonankubone, ikaba irega ivuga ko mu mpera za 2023 Nicki Minaj yayisabye kumufasha mu bitaramo bye bya Jingle Ball no kumurika album ye yitwa ‘Pink Friday 2’.

24/7 Productions mu kirego cya bo bavuze ko mbere y’uko habaho imikoranire babanje bakereka ikipe ifasha Nicki Minaj ingengo y’imari yari ikenewe bakanayemeranywaho.

Ndetse bakanafatanya kwanzura ibyo bagombaga kubafasha birimo aho cyabereye, abakozi bagikozemo, gutunganya amajwi n’amashusho, ibyuma by’umuziki, urubyiniro n’ibindi bikoresho byifashishijwe.

Iyo yatangaje ko yagerageje kenshi kwishyuza ayo mafaranga ariko itsinda rikorana n’uwo muhanzi rikaba ryabasubizaga igisubizo bise agasuzuguro kuko ngo barasubizaga bati: “Tuzabyitaho.” Ariko bikarangirira mu magambo gusa.

Iyo sosiyete ivuga kandi ko uwo muraperi yinjije asaga ibihumbi 650 by’amadolari ya Amerika mu bitaramo yakoreye Jingle Ball gusa, ariko bikamugora kwishyura ibihumbi 275 by’amadolari ya Amerika yari yahawe na 24/7 Productions ngo ayifashishe mu myiteguro.

Ibitaramo bya Jingle Ball Tour byabaye mu myaka ibiri ikurikirana harimo icyabaye mu Ukuboza 2022 n’ikindi cyabaye mu kwezi k’Ugushyingo 2023. Ni ibitaramo byabereye mu mijyi itandukanye nka Los Angeles, New York City, Chicago n’indi mijyi.

Ba uwa mbere mu kumenya amakuru agezweho!!!