Abakinnyi b’Abanyarwanda bakomeje gushyira imbaraga nyinshi mu gufasha amakipe yabo by’umwihariko abakina hanze, mbere yo guhamagarwa mu ikipe y’igihugu “Amavubi” yitegura imikino ya FIFA Series izabera i Kigali muri Werurwe 2026.

Imvaho Nshya igiye kubagezaho uko bamwe muri bo bitwaye mu mpera z’icyumweru, baba abakina muri Afurika no hanze yayo.

Ku Cyumweru, tariki ya 25 Mutarama 2026, Al Masry SC yo mu Misiri ikinamo Mugisha Bonheur yanganyije na Zamalek ubusa ku busa mu mukino wa gatatu mu y’amatsinda ya CAF Confederations Cup.

Uyu Munyarwanda ukina hagati yugarira yakinnye umukino wose.

Nairobi United ikinamo Buregeya Prince na Hakizimana Muhajdri yatsinzwe na Azam FC yo muri Tanzania mu mukino wa gatatu mu y’amatsinda ya CAF Confederations Cup.

Muri uwo mukino Hakizimana Muhajdri     yinjiye mu kibuga asimbuye ku munota wa 78 mu gihe myugariro Buregeya Prince atari mu bakinnyi bakoreshejwe kubera Ikibazo cy’imvune afite.

Zire FK yo mu cyiciro cya mbere muri Azerbaijan ikinamo Mutsinzi Ange Jimmy, yanganyije na Netfci ubusa ku busa mu mukino w’umunsi wa 17 wa Shampiyona, uyu myugariro w’Umunyarwanda yakinnnye umukino wose.

Hakim Sahabo ukina muri Standard de Liège iri mu cyiciro cya mbere mu Bubiligi, ntiyari mu bakinnyi bitabajwe mu mukino w’umunsi wa 22 wa Shampiyona banyagiwemo na Gent ibitego 4-0.

RAAL La Louvière na yo ikina muri iyi Shampiyona yatsinzwe na St. Truidense ibitego 2-1, mu mukino Umunyarwanda Samuel Gueulette yakinnye iminota yose.

Olympique Beja yo mu cyiciro cya mbere muri Tunisia ikinamo Ishimwe Annicet yatsinzwe AS Gabes igitego 1–0 mukino w’Umunsi wa 17 wa Shampiyona, iguma ku mwanya wa nyuma n’amanota 12.

Uyu Munyarwanda ukina hagati asatira ntiyari mu bakinnyi bakoreshejwe.

Rutahizamu w’Amavubi, Nshuti Innocent ukinira Espérance Sportive de Zarzis muri iyi Shampiyona yinjiye mu kibuga asimbuye ku munota wa 50 ndetse atsinda igitego cy’impozamarira cyabonetse kuri Penaliti yateye ku munota 90+1 birangira batsinzwe na JS Omrane ibitego 2-1.

Al Ahly Tripoli yo muri Libya ikinamo Manzi Thierry na Bizimana Djihad we na bagenzi babo bari kwitegura umukino wa Shampiyona bazahuramo na Abu Salim ku wa 27 Mutarama 2026.

Rutahizamu Gitego Arthur yabanje mu kibuga ku nshuro ya mbere mu ikipe ya Fus Rabat yo mu cyiciro cya mbere muri Maroc batsindwa na Mas Fees ibitego 4-2, uyu Munyarwanda yasimbuwe ku munota wa 34.

Myugariro Emmanuel Imanishimwe ukinira AEL Limassol yo mu cyiciro cya mbere muri Cyrus yari ku ntebe y’abasimbura mu mukino ikipe ye yatsinzwemo na Anorthosis Famagusta ibitego 2-1 mu mukino w’Umunsi wa 19 wa Shampiyona.

El-Merrikh Bentiu yo mu cyiciro cya mbere muri Sudani y’Epfo ikinamo Ishimwe Saleh na Serumugo Ali yanyagiye Lion Hunters ibitego 4-0 mu mukino w’umunsi wa 14 wa Shampiyona, ikomeza kuyobora Shampiyona n’amanota 37.

Myugariro Serumugo Ali uheruka gusinyira iyi kipe yakinnye iminota yose mu gihe Ishimwe Saleh atari mu bakinnyi bakoreshejwe.

Muhire Kevin ukinira Jamus SC na yo muri iyi Shampiyona yari ku ntebe y’abasimbura, ikipe ye inyangira na Al Ghazala Wau ibitego 6-2, iguma ku mwana wa kabiri n’amanota 35.

Ba uwa mbere mu kumenya amakuru agezweho!!!