Ntwali Fiacre yafashije Ts Galaxy gusezerera Mamelodi Sundowns
Siporo_

Ntwali Fiacre yafashije Ts Galaxy gusezerera Mamelodi Sundowns

Imvaho Nshya

October 19, 2023

Umunyezamu w’ikipe y’Igihugu y’u Rwanda y’umupira w’amaguru, Amavubi, Ntwari Fiacre, ukinira ikipe ya TS Galaxy muri Afurika y’Epfo, yafashije ikipe ye gusezerera ikipe ya Mamelodi Sundowns mu irushanwa rya” Carling Knockout Cup” akuyemo penaliti 2 nyuma yo kunganya ibitego 2-2.

Ku mugoroba wo kuri uyu wa Gatatu tariki ya 18 Ukwakira 2023, kuri Mbombela Stadium muri Afurika y’Epfo habereye umukino wa ⅛ mu Gikombe cyiswe Carling Knockout Cup, wahuzaga ikipe ya Mamelodi Sundowns na TS Galaxy isanzwe ikinwamo n’umuzamu w’ikipe y’Igihugu Amavubi, Ntwari Fiacre.

Ikipe ya TS Galaxy yatangiye neza uyu mukino itsinda ibitego bibiri hakiri kare harimo icya Sphiwe Prince Mahlangu cyo ku munota wa 12 n’icya Mlungisi Mbunjana yatsinze ku wa 16.

Igice cya Mbere cyarangiye TS Galaxy iyoboye umukino n’ibitego 2-0.

Mamelodi Sundowns yikubise agashyi mu gice cya kabiri bidatinze ku munota wa 57, Marcelo Allende yishyura igitego cya mbere. Ku munota wa 58, Bongani Zungu yahawe ikarita y’umutuku nyuma yo gukorera ikosa rikomeye Bernard Parker agasohorwa mu kibuga ku ngobyi kubera gukandagirwa mu kagombambari.

Iyi kipe yakomeje gusatira bikomeye iza kubona igitego cya kabiri cyatsinzwe na Gastón Sirino ku munota wa munani w’inyongera. Umukino warangiye amakipe yombi anganya ibitego 2-2 hongerwaho indi minota 30.

Muri penaliti esheshatu zatewe ku mpande zombi, umunyezamu Ntwari Fiacre ukinira TS Galaxy yatangiye akuramo iya mbere yari itewe na Brian Mandela.

Vladimir Silađi yahushije penaliti ya kane ya TS Galaxy amakipe yombi anganya izo yari amaze gutsinda. Ntwari yaje guhesha intsinzi ikipe ye ubwo yakuragamo penaliti ya nyuma ya Mamelodi Sundowns yatewe na Lesiba William Nku.

Umukino warangiye TS Galaxy yasezereye Mamelodi Sundowns kuri penaliti 5-4 nyuma yo kunganya ibitego 2-2.

Mbere yo kuva mu Rwanda, Fiacre Ntwali yakiniye APR FC yazamukiyemo, atizwa Marines FC, ayivamo ajya muri AS Kigali yavuyemo yerekeza muri Afurika y’Epfo muri Kamena uyu mwaka.

SHEMA IVAN

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA