Nyabihu: Ibitaro bya Shyira byahinduye ubuzima bw’abaturage
Ubukungu

Nyabihu: Ibitaro bya Shyira byahinduye ubuzima bw’abaturage

Imvaho Nshya

October 25, 2023

Abaturiye ibitaro bya Shyira biherereye mu Murenge wa Shyira, Akarere ka Nyabihu, bavuga ko kuva ibi bitaro byatangira imirimo yabyo uhereye umunsi bashyiragaho ibuye ry’ifatizo batangiye guhura n’inyungu zibikomokaho cyane ko abenshi bahamya ko byanatumye bihangira imirimo.

Bakomeza batangaza ko uretse kuba ibyo bitaro bitanga serivisi zo kwivuza, iyo ugeze mu nkengero z’ibitaro bya Shyira uhasanga, inyubako zinyuranye zikorerwamo imirimo inyuranye, ari za resitora, amaduka, ndetse n’abamotari benshi batwara abagenzi, iyo uganiriye n’abaturage bakubwira ko ibi bitaro byatumye bareba kure bakihangira imirimo.

Umwe mu bagore bakora ubucuruzi buciriritse harimo ibiribwa n’ibinyobwa abarwayi n’abarwaza bakenera, ukomoka mu Karere ka Nyanza, Muhawenimana Jeanne d’Aric yavuze ko   yari arangije kaminuza i Butare, mu ishami ry’ubumenyi bw’Isi, avuga ko yasanze abaturage bo muri Shyira barungutse ubuvuzi ndetse n’inyungu mu iterambere.

Yagize ati: “Nize muri kaminuza nzi ko nzabona akazi ka Leta ibi nabigerageje umwaka wose, ubwo ejobundi rero nazaga gusura marume hano ku bitaro bya Shyira, nasanze hari imikorere, kuko nasanze  uretse no kuba ibi bitaro biri mu cyaro; ariko biganwa n’abantu benshi kandi basobanutse bava mu Turere tunyuranye, natangiye nshuruza avoka ku muhanda, ngeze aho nsanga ari ngombwa ko nkodesha inzu nini, ku buryo rwose nk’uko na we ubibona iri duka ni iry’ibiribwa, kandi nkuramo amafaranga antunze njye n’umuryango wanjye, ubu nteganya kugura hano ikibanza nkiturira ino”.

Umumotari, Habanabakize Jean d’Amour, yagize ati: “Uyu  muhanda wabaye nyabagendwa, ndashima Paul Kagame, kuko kuri ubu ibi bitaro yazanye hano byatumye twihangira umurimo, ndetse n’abavaga hano ngo bagiye gukorera mu mujyi wa  Musanze baratahutse, ubu turakorana hano, ikindi kandi ubu abamotari hano bariyongereye kuko ubu bagura moto ari benshi”.

Yongeyeho ati: “Nzana hano umurwaza cyangwa se umurwayi akampa amafaranga bitewe n’aho mba namukuye, ntabwo rwose mbura no gutahana amafaranga ibihumbi 6 ku munsi, ibi bitaro bimaze kuduteza imbere, kuko inzu ya hano ntiyarenzaga amafaranga 1 500, none amaze kuba 15000; Perezida Kagame akomeje kutugezaho iterambere”.

Umuyobozi w’Akarere ka Nyabihu Mukandayisenga Antoinette, nawe ashimangira ko ibi bitaro uretse no kuba bitanga serivisi z’ubuvuzi byatumye abaturage bahumuka bituma biteza imbere.

 Yagize ati: “Ibi bitaro uretse kuba bivura abaturage bo mu bice binyuranye by’igihugu byatumye abaturage bareba kure bihangira umurimo umuturage wo hambere ibi bitaro bitaraza, usanga atandukanye n’uwo mu bihe bya mbere ibi bitaro bitarahagera kuko barasirimutse cyane kandi ubu haragenda hubakwa n’inyubako za kijyambere”.

Meya akomeza avuga ko umuturage wo muri Shyira yazamuye imyumvire mu iterambere aho ngo yamenye gushabika, ndetse amenya n’akamaro k’amashanyarazi aho kuri ubu basudira, ndetse ubu barakora ibintu binyuranye babikesha ingufu z’amashanyarazi, akaba asaba   abaturage gukomeza kubyaza amahirwe ibyo bikorwa remezo bagenda bashyirirwaho na Perezida wa Repubulika Paul Kagame.

Abagana ibi bitaro ni abaturage baturuka mu Mirenge yo mu Turere twa Gakenke, Muhanga Ngororero na Nyabihu. Ni ibitaro byaruzuye bitwaye miliyali 5 bikaba bifite ibyumba 150 bigezweho, kimwe n’amacumbi 34 yubakiwe abakozi hafi y’ibitaro ndetse abo bose bakaba bahahira abaturiye ibyo bitaro.

NGABOYABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA