Inzego zitandukanye n’Abatuye mu Murenge wa Shangi mu Karere ka Nyamasheke mu Ntara y’Iburengerazuba baherekeje nyakwigendera Nyirangirinshuti Thérèsie w’imyaka 63, warokotse Jenoside yakorewe Abatutsi mu 1994, wishwe n’utaramenyekana amutemaguje umuhoro mu ijosi.

Umuhango wo guherekeza nyakwigendera, witabiriwe n’inzego z’umutekano; Ingabo z’u Rwanda na Polisi mu Ntara y’Iburengerazuba.

Abaturage bo muri Shangi mu Karere ka Nyamasheke na bo bari mu muhango wo gushyingura nyakwigendera, ari benshi.

Nyakwigendera Nyirangirinshuti Thérèsie yashyinguwe mu cyubahiro kuri uyu wa Kabiri tariki 20 Gicurasi 2025.

Nyirangirinshuti yishwe mu ijoro ryo ku wa Gatandatu tariki 17 Gicurasi 2025, bikekwa ko byakozwe n’uwasabitswe n’ingengabitekerezo ya Jenoside yakorewe Abatutsi. 

Inzego z’umutekano ziherutse gusaba abaturage gutanga amakuru yafasha gutahura uwishe nyakwigendera.

Basabwe kandi kujya batangira amakuru ku gihe kuko bitumvikana ukuntu umuturanyi ashobora kwicwa ntihagire uwumva ubwo bugizi bwa nabi.