Ikipe ya Paris Saint-Germain yo mu Bufaransa yegukanye “FIFA Intercontinental Cup 2025” itsinze Flamengo yo muri Brésil penaliti 2-1 nyuma yo kunganya igitego 1-1 mu minota 120 yakinwe.

Uyu mukino wa nyuma wabereye muri Sutade ya Ahmad bin Ali  iherereye i Doha muri Qatar, mu ijoro ryo ku wa Gatatu tariki ya 17 Ukuboza 2025, witabirwa n’abafana basaga ibihumbi 42. 

PSG yatwaye UEFA Champions League i Burayi na ho Flamengo yatwaye Copa Libertadores muri Amerika y’Amajyepfo.

PSG ni yo yafunguye amazamu ku gitego cyatsinzwe na Fabián Ruiz ku munota wa cyenda, ariko nyuma yo kwifashisha ikoranabuhanga ry’amashusho bigaragara ko umunyezamu wa Flamengo yari yasubije umupira mu kibuga wageze hanze, hatangwa koruneri.

Iyi Kipe ntiyacitse intege kuko ku munota wa 38, Khvicha Kvaratskhelia yatsindiye iyi kipe yo mu Bufaransa igitego kimwe rukumbi cyabonetse mu gice cya mbere.

Mu igice cya kabiri Flamengo yagarukanye imbaraga zikomeye itangira gusatira izamu rya PSG. 

Ku munota wa 62’ Marquinhos wakiniye nabi Giorgian de Arrascaeta mu rubuga rw’amahina , Umusifuzi yemeza Penaliti.

Iyi penali yinjijwe neza Jorginho umupira ujya mu rushundura.

Iminota 90 yarangiye ari igitego 1-1, hitabazwa indi 30 yarangiye nta mpinduka zibaye hitabazwa za Penaliti. 

PSG ni yo yitwaye neza itsinda penaliti 2-1, aho zatsinzwe na Vitinha na Nuno Mendes bituma yegukana igikombe. Ni mu gihe Diego De la Cruz ari we waayinjije ku ruhande rwa Flamengo.

Paris Saint-Germain yabaye ikipe ya gatatu y’abagabo yegukanye ibikombe bitandatu mu mwaka umwe, mu Kinyejana cya 21, nyuma ya FC Barcelone mu 2009 na Bayern Munich mu 2020.

Ibyo bikombe yatwaye birimo Trophée des Champions, Ligue 1, Coupe de France, UEFA Champions League, UEFA Super Cup na FIFA Intercontinental Cup.

Ba uwa mbere mu kumenya amakuru agezweho!!!