Patriots BBC yatsinze REG BBC, amanota 85-78, mu mukino w’Umunsi wa 14 wa Shampiyona ya Basketball wabereye muri Petit Stade mu ijoro ryo ku wa Gatanu, tariki ya 13 Werurwe 2026.

Patriots BBC yatangiye neza umukino, Damaria Franklin, ayitsindira amanota menshi. Agace karangiye iyoboye umukino n’amanota 27 kuri 20 ya REG BBC.

Ikipe yakomeje gukina neza mu gace ka kabiri yongera ikinyuranyo ibifashijwemo na Damaria Franklin akorerwa mu ngata na Hubert Sage Kwizera.

Ku rundi ruhande, REG ntiyorohewe n’aka gace kuko amanota menshi yageragezaga ntiyajyagamo. Igice cya mbere cyarangiye Patriots BBC ikomeje kuyobora umukino n’amanota 47 Kuri 33 ya REG BBC.

Mu gace ka gatatu, umukino watangiye wegeranye, amakipe yombi agendana mu gutsinda amanota.

Mu minota itatu ya nyuma, Ikipe ya REG BBC yagerageje kugabanya ikinyuranyo binyuze mu bakinnyi barimo Isezerano Enock na Nshizirungu Patrick ariko Patriots ikomeza nk’ikipe nkuru. Ako gace karangiye ikomeje kuyobora umukino n’amanota 61-54.

Mu gace ka nyuma, REG BBC yakomeje kugabanya ikinyuranyo binyuze ku barimo Prince Muhizi na Cole Elliot Lamar ndetse banganya amanota (74-74).

Habura umunota umwe, Stubbs Tyrone na Damaria Franklin batsindiye Patriots amanota arindwi y’ingenzi bituma umukino urangira itsinze REG BBC amanota 85-78.

Muri uwo mukino Damaria Franklin na Stubbs Tyrone bakinira Patriots batsinze amanota 30 buri umwe.

Undi mukino wabaye ku wa Gatanu, Kepler BBC yatsinze Inspired Generation amanota 99–46.

Shampiyona izakomeza ku Cyumweru, aho Azomco izakina na EAUR BBC saa kumi n’imwe, mu gihe umukino utegerejwe uzahuza APR BBC na REG BBC guhera saa mbiri n’igice z’ijoro.

Ba uwa mbere mu kumenya amakuru agezweho!!!