Patthama Jitsawat ukomoka mu Ntara ya Chonburi, yegukanye ikamba rya Miss Grand Thailand 2026, anahabwa igihembo cy’uwakunzwe mu itangazamakuru. Uyu mukobwa usanzwe ari umuririmbyi yegukanye iryo kamba nyuma y’uko mu 2025, yari yikuye mu irushanwa rya Miss Universe Chonburi aho yasobanuye ko yaryikuyemo kugira ngo yibande ku muziki we. 

Mu byo Miss Patthama wahigitsemo abo yari ahatanye na bo 77, harimo ibisabwa muri iryo rushanwa bizwi nka “4B” ari byo Ubwiza (Beauty), imiterere (Body), ubwenge (Brain) n’ubushobozi bwo gucuruza no kwagura izina rye (Business).

By’umwihariko, yashimiwe ku ruhande rwa “Business” kuko yari asanzwe afite abafana benshi abikesha umuziki we wa “Luk Thung” ndetse no kuba yarigeze kwegukana igihembo cy’irushanwa rya ‘Grand Voice Award’.

Uretse Patthama Jitsawat, abandi bakobwa begukanye intsinzi barimo Panasaya Angelica DeMaagd wari uhagarariye Intara ya Buriram wabaye igisonga cya mbere, Ailin Naepsuk wabaye Igisonga cya Kabiri akaba yari ahagarariye Phuket.

Ni irushanwa ritagendekeye neza umukobwa Kamolwan Chanago uri mu baryitabiriye, wasebeye ku rubyiniro ubwo yisobanuraga imbere y’akanama nkemurampaka amenyo materano ye akavamo rikanarangira atashye amara masa.

Ni ibihembo byatanzwe mu ijoro ry’itariki 8 Werurwe 2026, aho biteganyijwe ko Patthama Jitsawat waryegukanye azajya guhagararira Thailand muri Miss Grand International mu Buhinde mu kwezi k’Ukwakira 2026. Patthama Jitsawat azwi cyane mu ndirimbo yakunzwe n’abatari bake yitwa Ning Pattama.

Ba uwa mbere mu kumenya amakuru agezweho!!!