Perezida wa Cuba, Miguel Díaz-Canel, yavuze ko azakomeza guhangana n’igitutu cya Perezida wa Leta Zunze Ubumwe za Amerika, Donald Trump umusaba kwegura, avuga ko kwegura bitari mu magambo yabo.

Mu kiganiro yagiranye na NBC News ku wa 09 Mata Perezida wa Cuba yavuze ko igihugu cye kigenga kandi gifite ubwisanzure n’uburenganzira bwo kwihitiramo icyerekezo kandi kitagengwa na Leta Zunze Ubumwe za Amerika. Yagize ati: “Abayobozi ba Cuba ntibatorwa na Leta ya Amerika.”

Kuva mu 2018, Perezida wa Cuba yatangiye gushyirwaho igitutu n’ubutegetsi bwa Donald Trump busaba impinduka, ndetse nyuma yo gushimuta Perezida wa Venezuela muri Mutarama, Trump yavuze ko Cuba iri mu marembera kandi ishobora kugira iherezo nk’irya Venezuela na Iran.

Mu kwezi gushize Perezida Trump yigambye ko yubatse igisirikare gikomeye kandi iyo bibaye ngombwa agikoresha bityo Igihugu gikurikiyeho ari Cuba.

Kuva Trump yashimuta Perezida wa Venezuela Nicolás Maduro, Cuba yahagarikiwe amavuta yohererezwaga, Amerika ishyiraho gahunda yo gukumira peteroli igana muri Cuba, inatera ubwoba ibindi bihugu ko bishobora gushyirirwaho imisoro ihanitse nibiramuka biyihaye peteroli.

Perezida Miguel Díaz-Canel, yamaganye ibyo yise politiki yo gushotorana ya Amerika avuga ko yatumye Cuba igira ibibazo bikomeye birimo kubura amashanyarazi kenshi, ibura rya peteroli ndetse bihungabanya gutanga amazi n’ibiribwa.

Kuva Trump yagaruka ku butegetsi umwaka ushize, yavuze ko Cuba ari ikibazo gikomeye ku mutekano w’Igihugu cye ndetse atera ubwoba ko ashobora kuyigarurira.

Ba uwa mbere mu kumenya amakuru agezweho!!!