Petro de Luanda yo muri Angola yegukanye irushanwa rya Basketball Africa League 2024 nyuma yo gutsinda Ah Ahly Benghazi yo muri Libya amanota 107- 94, mu mukino wa nyuma wabaye kuri uyu wa Gatandatu, tariki 1 Kamena 2024 muri BK Arena.

Iyi nyubako yari yuzuye abakunzi ba Basketball bari baje kwihera ijisho ibi birori. Ni umukino kandi wari witabiriye na Perezida Paul Kagame na Madamu Jeannette Kagame, Umuyobozi wa BAL, Amadou Gallo Fall ndetse n’Umuyobozi wa NBA Africa Clare Akamanzi.

Muri rusange uyu umukino watangiye begeranye cyane mu manota amakipe yombi atsindana bigaragara ko ntayemeraga gushyirwamo ikinyuranyo kinini. Agace ka mbere karangiye, Petro de Luanda iyoboye umukino n’amanota 26 kuri 24 ya Al Ahly Benghazi.

Mu gace ka kabiri, Markeith Cummings na Nicholas Faust bakomeje gufasha Petro gutsinda ari nako Lual Lual Acuil na Golden Robert babigenzaga ku rundi ruhande.

Mu minota itanu ya nyuma y’aka gace, Al Ahly yongereye ikinyuranyo kigera mu manota 10 (43-33). Igice cya mbere cyarangiye Al Ahly Benghazi iyoboye umukino n’amanota 52 kuri 40 ya Petro de Luanda.

Mu karuhuko, umuhanzi The Ben uri mu bakomeye muri muzika nyarwanda yataramiye abitabiriye uyu mukino, aho yaririmbye nyinshi mu ndirimbo ze zakunzwe nka Forever na Why yafatanyije na Diamond.

Petro de Luanda yagiye mu gace ka gatatu yiyuburuye, Yanick Moreira, Lukeny Gonçalves na Childe Dundao bayitsindira amanota menshi ikuramo ikinyuranyo cyose amakipe yombi anganya amanota 71-71.

Mu gace ka nyuma, umukino wakomeje kwegerana amakipe yombi agendana mu manota ariko Petro ikagenda imbere n’ikinyuranyo cy’amanota make cyane.

Mu minota ibiri ya nyuma, Petro yatsinze amanota menshi ikinyuranyo kigera mu manota 15.

Umukino warangiye Petro de Luanda itsinze Al Ahly Libya   Benghazi amanota 107-94, yegukana igikombe cya BAL 2024 ku nshuro ya mbere, iba ikipe ya mbere yo munsi y’ubutayu rwa Sahara yegukanye iri rushanwa kuva 2020 ritangiye gukinwa.

Lual Lual Acuil Jr’s ukinira Al Ahly Libya yatowe nk’umukinnyi mwiza w’iri rushanwa.

Rivers Hoopers yo muri Nigeria ni yo yegukanye umwanya wa gatatu muri BAL 2024, nyuma yo gutsinda Cape Town Tigers yo muri Afurika y’Epfo amanota 80-57 ku wa Gatanu.

Umutoza wa Rivers Hoopers yo muri Nigeria, Ogoh Odaudu yagizwe uwahize abandi muri BAL 2024.

Ikipe yegukanye Igikombe cya BAL ihabwa amadolari y’Amerika ibihumbi 100, iya kabiri ihabwa ibihumbi 75, iya gatatu ifata ibihumbi 55 mu gihe iya kane icyura ibihumbi 25 by’amadolari y’Amerika.