Police FC yanganyije na Rayon Sports 0-0 mu mukino ubanza wa ¼ cy’Igikombe cy’Amahoro wabereye kuri Kigali Pele Stadium, kuri uyu wa Kane, tariki 12 Werurwe 2026. 

Police FC yageze muri iki cyiciro isezereye Gicumbi FC mu gihe Rayon Sports yakuyemo City Boys.

Rayon Sports ni yo yatangiye neza umukino igeregeza gusatira izamu rya Police FC harimo umupira watewe na Fall Ngagne, umunyezamu Rukundo Onesime awukuramo.

Mu minota 15, Police FC yongereye imbaraga itangira gusatira binyuze mu bakinnyi bayo basatira barimo Ani Elijah ariko bakagorwa no kwinjira mu bwugarizi bwa Rayon Sports 

Ku munota wa 26’ Rayon Sports yakoze impinduka zihuse Emery Bayisenge wari wavunitse asimburwa na Nshimiyimana Emmanuel “ Kabange” . 

Mu minota 30, Abakinnyi ba Police FC bakomeje kwiharira cyane umupira bakiniraga hafi y’urubuga rw’amahina rwa Rayon Sports bashaka gufungura amazamu.

Iyi kipe Polisi y’igihugu yakomeje gukina neza harimo uburyo Kwitonda Alain ‘Bacca’ yahushije ari imbere y’izamu ku ishoti yateye Ani Elijah yamucomekeye umupira, umunyezamu Kwizera Olivier awufata neza.

Ku munota wa 3 w’inyongere nyuma y’aho iminota y’igice cya mbere yari irangiye, Ani Elijah yahaye umupira Gakwaya Leonard, ateye mu izamu Kwizera Olivier arirambura atabara, awushyira muri koruneri itagize icyo itanga.

Iminota 45 ibanza y’umukino yarangiye amakipe yombi anganyije ubusa ku busa. 

Mu gice cya kabiri, umukino watangiye wegeranye cyane nta kipe irema uburyo bw’igitego , ahubwo umupira ukarenga cyane n’amakosa menshi.

Ku munota wa 57’ Rayon Sports yakoze impinduka Tony Kitoga na Mugisha Didier basimbura Bigirimana Abedi na Sindi Jesus Paul.

Mu minota 65’ Police FC yongeye kwiharira umupira hagati mu kibuga isatira cyane izamu rya Rayon Sports harimo uburyo bwiza, Kwitonda Alain ‘Bacca’ yahushije ku mupira yateye hejuru y’izamu ari wenyine mu rubuga rw’amahina. 

Ku munota wa 72’ Police FC yakoze impinduka Byiringiro Lague na Rudasingwa Prince basimburwa na Kwitonda Alain na Ani Elijah.

Iminota 10 ya nyuma yaranzwe no gusatira ku mpande zombi buri kipe ihusha uburyo bw’igitego imbere y’izamu.

Mbere y’uko umukino urangira umusifuzi wa Kane yongeyeho iminota ine y’inyongera 

Ku munota wa 90+2’ Tony Kitoga yashoboraga gutsinda igitego ku ishoti yateye mu izamu, Nsabimana Zidane awukuraho n’umutwe ujya muri koruneri itagize icyo itanga. 

Ku munota wa 90+4’ Richard Kirongozi wa Police FC yeretswe ikarita y’umuhondo ya Kabiri ku ikosa yakoreye Aziz Bassane isanga iya mbere zibyara umutuku.

Umukino warangiye amakipe yombi anganyije ubusa ku busa mu mukino ubanza. Biteganyijwe ko umukino wo kwishyura uteganyijwe ku wa 19 Werurwe 2026.

Ba uwa mbere mu kumenya amakuru agezweho!!!