Police FC yatsinze Gasogi United igitego 1-0 mu mukino w’umunsi wa 11 wa Shampiyona y’icyiciro cya mbere mu Rwanda, wabereye kuri Kigali Pele Stadium, kuri uyu wa Gatanu, tariki ya 12 Ukuboza 2025.

Ni umukino watangiye ugenda gahoro amakipe yombi nta buryo bw’igitego arema.

Mu minota 35’ amakipe yombi yakomeje gukinira cyane mu kibuga hagati nta buryo bwo kugera imbere y’izamu, ahubwo akora amakosa yo kurenza umupira kenshi .

Ku munota 39’ Gasogi United yabonye uburyo bw’igitego ku mupira Muhindo Collin yahaye Hakim Hamis wari inyuma y’uburuga rw’amahina, awuteye unyura ku ruhande rw’izamu.

Igice cya mbere cyarangiye amakipe yombi anganyije ubusa ku busa.

Mu gice cya kabiri, Police FC yagarukanye imbaraga nyinshi isatira ndetse ku munota wa 49 ‘yabonye uburyo bwiza imbere y’izamu ku mupira Ani Elijah yahaye Kwitonda Alain Bacca wari imbere y’izamu awuteye yigaramye ujya hanze y’izamu.

Iyi kipe ya Polisi y’Igihugu ntiyacitse intege, bidatsinze ku munota wa 53’ yafunguye amazamu ku gitego cyatsinzwe na Ani Elijah ku mupira mwiza yacomekewe na Kwitonda Alain Bacca ari mu kibuga hagati asiga ba myugariro ba Gasogi United ahita awutera mu izamu.

Ku munota wa 58’ Kwitonda Alain Bacca yongeye gucomekera umupira mwiza Ani Elijah asiga ba myugariro ba Gasogi United, agiye kuwutera akorerwa ikosa mu rubuga rw’amahina na Muhindo Collin umusifuzi Uwikunda Samuel yemeza ko ari Penaliti.

Iyo Penaliti yatewe na Byiringiro Lague, umupira ukurwamo neza n’umunyezamu Cyuzuzo Aime Gael ujya muri Koruneri itagize icyo itanga.

Ku munota wa 70’ Gasogi United yongeye itangira gusatira izamu rya Police FC, harimo Koruneri ebyiri zikurikiranya yabonye ariko ubwugarizi bwa Police FC bwihagaraho.

Ku munota wa 73’ Police FC yabonye amahirwe yo gutsinda igitego cya kabiri ku mupira Byiringiro Lague yazamukanye, awuha Richard Kirongozi warebaga izamu ryose, awuteye myugariro wa Gasogi United aratabara akuraho.

Mbere y’uko umukino urangira, umusifuzi wa Kane yongeyeho iminota itanu y’inyongera.

Ku munota wa 90+4’ Nkubana Marc wa Gasogi United yabonye ikarita ya Kabiri y’umuhondo ku ikosa yakoreye Byiringiro Lague bimuviramo, guhabwa ikarita itukura.

Ku munota wa 90+5’ Gasogi United yabonye amahirwe yo kwishyura kuri Coup Franc nziza yatewe na Udahemuka Jean De Dieu umupira umunyezamu Rukundo Oseme awushyira muri koroneri.

Umukino warangiye Police FC yatsinze Gasogi United igitego 1-0, yongera kubona amanota atatu nyuma yo kunganya imikino itatu iheruka.

Ikipe ya Polisi y’Igihugu yakomeje kuyobora urutonde rw’agateganyo n’amanota 26 mu mikino 12 imaze gukina naho Gasogi United yagumye ku mwanya wa Kane n’amanota 18 mu mikino 12 yakinnye.

Indi mikino y’umunsi wa 11 izakinwa ku wa Gatandatu tariki ya 13 Ukuboza 2025

Gorilla FC izakira APR FC saa 15:00

AS Muhanga izakira AS Kigali saa 15:00

Musanze FC izakira Etincelles FC saa 15:00.

Ba uwa mbere mu kumenya amakuru agezweho!!!