Ikipe ya Paris Saint Germain yegukanye Igikombe kiruta ibindi ku Mugabane w’u Burayi “UEFA Super Cup” nyuma yo gutsinda Tottenham Hotspur penaliti 4-3. Ni nyuma y’uko amakipe yombi inganyije ibitego 2-2 mu minota 90 isanzwe y’umukino.

Uyu mukino wabaye mu ijoro ryo ku wa Gatanu tariki ya 13 Kanama 2025, kuri Stade yitwa Bluenergy ihereye mu Mujyi wa Udine wo mu Butaliyani.

Igikombe cya UEFA Super Cup gikinirwa n’ikipe yatwaye UEFA Champions League n’iyatwaye UEFA Europa League. 

Ni umukino watangiye amakipe yombi atari hejuru kuko yakiniraga mu kibuga hagati nta buryo bw’ibitego ari kurema. 

Uburyo wa mbere bwabonetse bwabonywe na Tottenham ku munota wa 23 buturutse ku ishoti rikomeye Richarlison yatereye inyuma y’urubuga rw’amahina, umunyezamu wa PSG, Lucas Chevalier, arirambura awohereza hejuru y’izamu.

Ku munota wa 39’ Tottenham yafunguye amazamu ku gitego cyatsinzwe na Micky van de Ven, nyuma y’uko Chevalier akuyemo umupira wari utewe na João Palhinha.

Igice cya mbere cyarangiye iyi kipe yo mu Bwongereza iyoboye umukino n’igitego 1-0. 

Igice cya kabiri na cyo cyatangiye neza kuri Tottenham Hotspur, kuko yabonye igitego cya kabiri ku munota wa 48 cyatsinzwe na Cristian Gabriel Romero watsindishije umutwe umupira wari uvuye kuri ‘coup franc’ yatewe na Pedro Porro.

Ku munota wa 67, Bradley Barcola yatsinze igitego cya Paris Saint-Germain ariko nticyemerwa kuko umusifuzi yari yabonye ko yararuriye.

Lee Kang-In winjiye mu kibuga asimbuye Warren Zaïre-Emery, yaherejwe umupira na Vitinha ku munota wa 85, ashyiramo igitego cya mbere cyo kwishyura cya PSG.

Paris Saint-Germain yahise yigarurira icyizere, mu minota itanu yongeweho kuri 90 y’umukino, Gonçalo Ramos winjiye asimbura Désiré Doué, ahita anatsinda igitego cyo kunganya cya kabiri.

Umukino warangiye amakipe yombi anganyije ibitego 2-2, bituma bajya muri penaliti.

Micky Van de Van na Mathys Tel ba Tottenham bazihushije mu gihe  Vitinha ari we wahushije ku ruhande rwa Paris Saint Germain bituma ihita inatwara igikombe ku nshuro ya mbere itsinze penaliti 4-3.

Iki Gikombe cyabaye icya gatanu PSG yegukanye muri uyu mwaka wa 2025 nyuma y’igikombe cya Shampiyona, Coupe de France, Trophée des Champions na UEFA Champions League.