Ku Munsi wayo w’Igikundiro, Rayon Sports yatsinzwe na Azam FC yo muri Tanzania igitego 1-0 mu mukino wa gishuti wabereye kuri Kigali Pelé Stadium kuri uyu wa Gatandatu, tariki ya 3 Kanama 2024.

Ni umukino wari witabiriwe n’abafana buzuye iyi stade y’i Nyamirambo, ni wo wasoje ibirori bya Rayon Sports Day yaranzwe na byinshi bitandukanye birimo kwerekana abakinnyi Gikundiro izakoresha mu mwaka w’imikino mushya wa 2024/25.

Mbere yo gutangira umukino, harambuwe igitambaro kinini hagati mu kibuga, cyanditseho “Umunsi w’Igikundiro”.

Rayon Sports yatangiye umukino neza ihererekanya umupira hagati mu kibuga nubwo nta buryo bukomeye yabonaga uretse umupira wahinduwe muri metero esheshatu na Haruna Niyonzima.

Azam FC yatangiye kwinjira mu mukino maze ku munota wa 14 ibona uburyo bwa mbere ku mupira Gibril Sillah yacomekeye Fie Toto awuteye ishoti rikomeye rishyirwa muri koruneri na Khadime Ndiaye.

Ku munota 17 ‘Rayon Sports yahushije igitego cyabazwe ku mupira Iraguha Hadji yahinduye usanga Charles Bbaale mu rubuga rw’amahina, ashyizeho umutwe, ujya ku ruhande gato rw’izamu rya Azam FC.

Ku munota wa 31 Rayon Sports yongeye guhusha uburyo bwiza ku mupira Muhire Kevin yateye uteretse, usanga Nsabimana Aimable uwushyizeho umutwe, ku bw’amahirwe make ushyirwa muri koruneri n’Umunyezamu Mohammed Mustafa wa Azam FC.

Amakipe yombi yakomeje gusatirana ariko gutera mu izamu bikagorana cyane.

Iminota 45 ibanza y’umukino yarangiye amakipe anganya ubusa ku busa.

Mu gice cya kabiri ku munota wa 53 Rayon Sports yakoze impinduka maze Elenga-Kanga asimbura Haruna Niyonzima naho Rukundo Abdul Rahman asimbura Niyonzima Olivier ‘Seif’.

Ku munota wa 56 Azam FC yafunguye amazamu  ku gitego gitsinzwe na Lusajo Mwaikenda n’umutwe.

Nyuma yo gutsinda igitego cya mbere yashoboraga kubona igitego cya kabiri ku munota wa 57 ku mupira winjiranywe na Adolf Mtasingwa iburyo, unyura ku ruhande gato rw’izamu rya Gikundiro.

Ku munota wa 66 Rayon Sport yongeye gukora impinduka ishaka igitego cyo kwishyura, Adama Bagayogo asimbura Charles Bbaale.

Nyuma yo gukora izi mpinduka Rayon Sport yongeye gusatira izamu rya Azam FC harimo uburyo bwabonetse ku munota wa 73 ku mupira Omborenga Fitina yahaye, Rukundo Abdul Rahman uwuteye uca ku ruhande rw’izamu.

Iminota 10 ya nyuma yihariwe na Rayon Sport ishaka igitego cyo kwishyura ariko ba myugariro ba Azam bakomeza kugarira neza cyane.

Iminota 90 yarangiye Rayon Sports itsinzwe na Azam FC igitego 1-0, uba umukino wa kane inaniwe gutsinda mu yo imaze gukina yitegura umwaka w’imikino mushya.

Iyi kipe yo muri Tanzania yahise itwara igikombe cyateguwe na Sosiyete y’Imikino y’Amahirwe ya Choplife.

Ni inshuro ya kane kandi Rayon Sports itsinzwe ku munsi wayo kuko mu 2021 yatsinzwe na Kiyovu Sports ibitego 2-1, mu 2022 itsindwa na Vipers SC igitego 1-0,mu 2023 yatsinzwe na Kenya Police FC igitego 1-0 ,Iheruka intsinzi yo kuri uyu munsi mu 2019 ubwo yatsindaga Gasogi United ibitego 3-1

Gikundiro izasubira mu kibuga ku wa Gatandatu, tariki ya 17 Kanama 2024, ikina na Marines FC ku munsi wa mbere wa Shampiyona ya 2024/25.

Abakinnyi babanje mu kibuga ku mpande zombi

Rayon Sports

Khadime Ndiaye, Muhire Kevin (c) Omborenga Fitina, Bugingo Hakim, Nsabimana Aimablle, Gning Omar, Iraguha Hadji, Niyonzima Olivier, Charles Bbaale, Niyonzima Haruna na Aruna Madjaliwa.

Azam FC

Mohamed Mustafa, Lusajo Mwaikenda (C), Cheikh Sidibe Yeison Fuentes, Yannick Bangala, Adolf Mtasingwa, Franck Tiesse, James Akaminko, Jhonier Blanco, Fei Toto na Gibril Sillah.