Rayon Sports yatsinze Musanze FC ibitego 2-0 mu mukino w’Umunsi wa 10 wa Shampiyona, ihagarika urugendo rw’imikino itatu yari imaze idatsinda.

Uyu mukino wabereye kuri Kigali Pele Stadium, ku mugoroba wo kuri uyu wa Gatanu, tariki ya 5 Ukuboza 2025.

Amakipe yombi yagiye gukina uyu mukino yaranganyije imikino aheruka gukina.

Rayon Sports ni yo yatangiye neza umukino bidatsinze ku munota wa 5 yafunguye amazamu ku gitego cyatsinzwe na Tony Kitoga ku ishoti rikomeye yatereye hanze y’ubuga rw’amahina, umunyezamu ananirwa gukuraho umupira ujya mu rushundura.

Umukino wakomeje kwihuta no mu minota 20 ari na ko Musanze FC yari yatangiye kwibona mu mukino, byatumaga uryohera ijisho kuko amakipe yombi yasatiraga.

Aziz Bassane yazamukanye umupira mwiza ku ruhande rw’iburyo awuhindura imbere y’izamu, Habimana Yves atsinda igitego cya kabiri ku munota wa 34.

Mbere y’uko Igice cya mbere kirangira Umusifuzi wa Kane yongeyeho iminota itatu y’inyongera.

Ku munota wa 45 +2’ Serge Murangamirwa wa Musanze FC yeretswe ikarita itukura nyuma yo gutera inkokora Aziz Bassane Koulagna.

Igice cya mbere cyarangiye Rayon Sports yatsinze Musanze FC ibitego 2-0.

Gikundiro yatangiranye igice cya kabiri imbaraga nyinshi, aho ku munota wa 48 Bassane yahushije uburyo bukomeye asigaranye n’umunyezamu Nsabimana Jean de Dieu.

Mu minota 70, umukino watuje ugabanya umuvuduko wagenderagaho ari na ko uburyo bw’ibitego bwabaga buke.

Umukino warangiye Rayon Sports yatsinze Musanze FC ibitego 2-0, ihagarika urugendo rw’imikino itatu yari imaze idatsinda muri Shampiyona.

Gikundiro yahise ifata umwanya wa Kane n’amanota 17 ni mu gihe Musanze FC yagumye ku mwanya wa Gatandatu n’amanota 16.

Indi mikino yabaye kuri uyu wa Gatanu, Kiyovu Sports yanyagiye Etincelles FC ibitego 4-1 harimo bitatu bya Uwiyaremye Fidali naho Mukura VS yatsinze Bugesera FC igitego 1-0 cyinjijwe na Iradukunda Elie Tatou.

Indi mikino y’Umunsi wa 10 wa Shampiyona izakinwa ku wa Gatandatu, tariki ya 6 Ukuboza 2025.

AS Muhanga izakina n’Amagaju FC saa 15:00

Rutsiro FC izakira Gorilla FC saa 15:00

Gasogi United izakira Marines FC saa 15:00

APR FC izakina na Police FC saa 18:30

Ba uwa mbere mu kumenya amakuru agezweho!!!