AS Kigali yatsinze Rayon Sports ibitego 2-0 mu mukino w’umunsi wa munani wa Shampiyona wabereye kuri Kigali Pele Stadium kuri iki Cyumweru tariki ya 23 Ugushyingo 2025. 

Amakipe yombi yagiye gukina ataritwaye neza mu mikino iheruka, aho Rayon Sports yatsinzwe na APR FC ibitego 3-0 naho AS Kigali inganya na Police FC.

Ni umukino watangiye ugenda gake nta kipe irema uburyo bwo gutsinda igitego, umupira ukinirwa cyane mu kibuga hagati. 

Ku munota wa 24, Rayon Sports yabonye uburyo bwa mbere bugana ku izamu ku mupira wazamukanywe na Aziz Bassane, usanga Tony Kitoga ateye ishoti rinyura ku ruhande. 

Iyi Kipe yambara uburu n’umweru yakomeje gusatira ishaka gufungura izamu harimo uburyo bwiza bwabonywe na Adama Bagayogo atera ishoti rikomeye ari inyuma y’urubuga rw’amahina, umupira ufatwa neza n’umunyezamu Niyonkuru Kanuma Pascal.

Ku munota wa 38, umukino wagabanyije umuvuduko amakipe yombi atangira gukora amakosa menshi mu kibuga hagati.  

Igice cya mbere cyarangiye amakipe yombi anganyije ubusa ku busa. 

AS Kigali yatangiranye impinduka mu gice cya kabiri, Tuyisenge Arsene asimburwa na Dushimimana Olivier ‘Muzungu’.

Muri iki gice, Rayon Sports yakomeje gusatira harimo uburyo bwiza bwahushijwe na Adama Bagayogo ku mupira watakajwe na Benedata Janvier, arobye umunyezamu Niyonkuru ujya hejuru gato. 

Ku munota wa 65, AS Kigali yinjiye mu mukino itangira gusatira izamu rya Rayon Sports binyuze ku mipira yahindurwaga ivuye ku ruhande rw’iburyo. 

Ku munota wa 68, Ndayishimiye Richard wa Rayon Sports yakoreye ikosa Rudasingwa Prince inyuma y’urubuga rw’amahina mu ruhande rw’iburyo. 

Iri kosa ryahanwe na Ntirushwa Aime umupira usanga Nshimiyimana Tharcisse wari uhagaze neza atera ishoti rikomeye umunyenzamu Mugisha Yves ananirwa kuwukuramo ujya mu izamu. 

Ku munota wa 72, AS Kigali yabonye amahirwe yo gutsinda igitego cya kabiri ku mupira Iyabivuze Osee yinjiranye ateye ishoti rikomeye ukora  kuri myugariro wa Rayon Sports ujya muri koruneri itagize icyo itanga.

Ku munota wa 83, AS Kigali yahushije igitego kidakunze guhushwa ku mupira Dushimimana Olivier yanze gutera mu izamu, awuha Iyabivuze Osee wagowe no gushyira umupira mu izamu ryambaye ubusa, ushyirwa muri Koruneri na myugariro wa Rayon Sports.

Iyi Koruneri yatewe neza na Aime Ntirushwa usanga Dushimimana Olivier ‘Muzungu’ wari uhagaze neza, atsinda igitego cya kabiri cya AS Kigali. 

Iminota ya nyuma y’umukino Rayon Sports yagerageje gusatira ishaka kugabanya ikinyuranyo ariko biranga. 

Umukino warangiye AS Kigali itsinze Rayon Sports ibitego 2-0 yongera kubona intsinzi nyuma gutsindwa imikino ibiri muri itatu iheruka gukina muri Shampiyona.

Rayon Sports yatsinzwe umukino wa kabiri wikurikiranya muri Shampiyona, nyuma yo gutsindwa na APR FC ibitego 3-0.

AS Kigali yafashe umwanya wa 11 n’amanota umunani mu gihe Rayon Sports yagumye ku mwanya wa kane n’amanota 13. 

Undi mukino wabaye kuri iki Cyumweru, AS Muhanga yatsinze Mukura VS ibitego 2-1. 

Abakinnyi 11 babanje mu kibuga hagati b’impande zombi

Rayon Sports:

Mugisha Yves, Yousou Diagne, Sindi Jesus Paul, Emery Bayisenge, Nshimiyimana Emmanuel, Richard Ndayishimiye, Ishimwe Fiston, Habimana Yves, Aziz Bassane, Adam Bagayogo na Tonny Kitoga. 

AS Kigali:

Niyonkuru Kanuma Pascal, Eze Isaac, Janvier Benedata, ILias Rucogoza, Aime Ntirushwa, Tharcisse Nshimiyimana, Arsene Tuyisenge, Didier Ndayishimiye, Onyeabor Franklin Chukwuebuka, Osee Iyabivuze na Prince Rudasiganwa.

Ba uwa mbere mu kumenya amakuru agezweho!!!