Urwego rw’u Rwanda rushinzwe Igorora (RCS) n’Itorero Angilikani mu Rwanda (EAR) basinyanye amasezerano agamije ubufatanye.

Ubutumwa bwa RCS buri ku rubuga rwa X, bugaragaza ko amasezerano yasinywe n’impande zombi, arebana no gufatanya ndetse no gushyigikira ibikorwa byo gusubiza mu buzima busanzwe abagororwa.

Ni amasezerano yasinywe kuri uyu wa Gatanu tariki 28 Ugushyingo, ku cyicaro gikuru cy’Urwego rw’u Rwanda rushinzwe Igorora giherereye i Kanombe mu Karere ka Kicukiro mu Mujyi wa Kigali.

Amasezerano yashyizweho umukono na Komiseri Mukuru wa RCS, CG Evariste Murenzi na Rev Sano Steven, Umunyamabanga w’Itorero Angilikani mu Rwanda, wari uhagarariye Musenyeri Laurent Mbanda, Umushumba Mukuru w’iri torero.

Ubuyobozi bwa RCS bwatangaje buti: “Aya masezerano arebana no gufatanya no gushyigikira RCS mu bikorwa byo gusubiza abagororwa mu buzima busanzwe no kongera kubahuza n’imiryango.”

Urwego rw’u Rwanda rushinzwe Igorora rutangaza ko mu masezerano yasinywe, harimo n’ingingo yo gufasha abagororwa mu bijyanye n’umwuka n’imyifatire, ndetse no gutanga ubufasha bw’ibikoresho ku bagororwa batishoboye.

Itorero Angilikani mu Rwanda risanzwe rikorana n’Urwego rw’u Rwanda rushinzwe Igorora kuko mu mpera z’umwaka ushize, abakirisito EAR, basuye Igororero ry’abana rya Nyagatare batanga inyigisho z’ihumure n’inkunga y’ibikoresho bitandukanye.

Itorero Angilikani mu Rwanda ku bufatanye n’umuryango Prison Fellowship, mu bihe bitandukanye ribatiza abayoboke baryo bari hirya no hino mu magororero baba bamaze iminsi bakurikirana inyigisho z’umubatizo muri iryo dini.

Ba uwa mbere mu kumenya amakuru agezweho!!!