Real Madrid yatsinze Benfica igitego 1-0 mu mukino ubanza wa Kamarampaka wa UEFA Champions League wahagaze iminota 10 kubera irondaruhu ryakorewe Vinícius Júnior.

Mu ijoro ryo ku wa Kabiri, tariki ya 17 Gashyantare 2026, ni bwo mu bihugu bitandukanye habereye imikino ya kamarampaka (play-offs) ku makipe atarabonye itike y’ako kanya ya ⅛.

Umukino wari utegerejwe na benshi ni uwahuje Real Madrid yo muri Espagne na Benfica yo muri Portugal ari na yo yari yakiriye uwo mukino kuri Estadio da Luz.

Igice cya mbere cyarangiye amakipe yombi anganyije ubusa ku busa.

Real Madrid yagarukanye imbaraga mu igice cya kabiri bidatinze ku munota wa 50, Vincius Junior yafunguye amazamu ku ishoti rikomeye yateye ari mu rubuga rw’amahina, umupira uruhukira mu rushundura.

Nyuma y’iki gitego, umukino wahagaze iminota 10 ubwo Vinícius Júnior yagaragazaga ko yakorewe irondaruhu na Gianluca Prestianni ukinira Benfica, akabibwira umusifuzi François Letexier, ndetse we na bagenzi be bikura mu kibuga by’igihe gito.

Umutoza wa Benfica, José Mourinho, yahawe ikarita itukura ku munota wa 85.

Umukino warangiye Real Madrid yatsinze Benfica igitego 1-0.

Amakipe yombi azahurira i Madrid ku wa Gatatu utaha, mu mukino wo kwishyura.

Mu yindi mikino yabaye harimo uwabimburiye indi wahuje Galatasaray yo muri Turukiya yatunguye Juventus yo mu Butaliyani iyinyagira ibitego 5-2.

Umukino wahuje AS Monaco na Paris Saint-Germain zo mu Bufaransa, warangiye PSG itsinze ibitego 3-2 byinjijwe na Ashraf Hakim na Desire Doue watsinze bibiri mu gihe AS Monaco yatsindiwe na Folarin Balogun.

Borussia Dortmund yafashijwe na Serhou Guirassy na Maximilian Beier gutsinda Atalanta ibitego 2-0.

Indi mikino ibanza ya kamarampaka iteganyijwe kuri uyu wa Gatatu harimo uwa Qarabag na Newcastle United, Bodo/ Glimt na Inter Milan, Club Brugge na Atletico Madrid ndetse na Olympiacos icakirana na Bayern Leverkusen.

Ba uwa mbere mu kumenya amakuru agezweho!!!