Real Madrid yo muri Espagne, yegukanye igikombe cya UEFA Super Cup itsinze Atalanta yo mu Butaliyani ibitego 2-0, mu mukino wabaye ku mugoroba wo ku wa Gatatu muri Polgne. 

Wari umukino wa mbere kuri Rutahizamu w’Umufaransa Kylian Mbappé uheruka kwerekeza muri Real Madrid.

Real Madrid ni yo yegukanye UEFA Champions League mu gihe Atalanta yegukanye UEFA Europa League. 

Atalanta yatangiye umukino yiharira umupira,  abakinnyi barimo Ademola Lookman na Ruggeri bagerageje uburyo bwo gushaka ibitego, ariko bakagorwa na ba myugariro ba Real Madrid bari bayobowe na Antonio Rüdiger.

Ku munota wa 32, Mbappé yafashe umupira nyuma yo gucenga abakinnyi batatu ba Atalanta, ageze kuri myugariro Djimsiti awumukuraho neza.

Ku munota wa 35, Real Madrid yabonye uburyo bwa Jude Bellingham bwari kubyara amahirwe y’igitego, gusa byarangiye akoreye ikosa umunyezamu wa Atalanta, Juan Musso, ndetse ahabwa ikarita y’umuhondo.

Ku munota wa 45, Vinícius Júnior yahushije uburyo bwiza bwo gutsinda igitego 

Igice cya mbere cyarangiye amakipe yombi anganyije ubusa ku busa.

Mu gice cya kabiri, na bwo Atlanta yagarutse isatira, ariko na Real Madrid yari yiminjiriyemo agafu.

Vinícius Júnior, Mbappé na Jude Bellingham, bagumye gushaka amayeri bakoresha ngo bace mu rihumye ba myugariro ba Atalanta, na bo baguma kuba ibamba.

Ku munota wa 59, Jude Bellingham yacenze abakinnyi ba Atalanta, atanga umupira kwa Vinícius Júnior na we arabasubira, ahita awerekeza kuri Federico Valverde watsinze igitego cya mbere.

Real Madrid ikimara kubona igitego cya mbere, yahise ikomeza gusatira cyane ndetse byongera kuyihira ku munota wa 68 aho Kylian Mbappé yatsinze igitego cya kabiri. 

Umukino warangiye Real Madrid itsinze Atalanta ibitego 2-0, iba ikipe ya mbere yegukanye UEFA Super Cup inshuro esheshatu.

Kapiteni wa Real Madrid Umunya-Croatia, Luka Modrić yabaye umukinnyi wa mbere wegukanye ibikombe byinshi (27) mu mateka ya Real Madrid.