REG  BBC 77-67 Kuwait

REG BBC 65-74 Bahrain

REG BBC 89-53 Qatar

Ikipe ya REG BBC ihagarariye u Rwanda mu mikino y’Afurika   y’amakipe yatwaye ibikombe iwayo muri  Basketball mu bagabo  “Africa Basketball League 2022” izakina imikino ya nyuma izabera mu Rwanda kuva taliki 21 kugeza 28 Gicurasi 2022  aho izakina na FAP yo muri Cameroun mu mukino wa ¼ uteganyijwe taliki 21 Gicurasi 2022.

Mu rwego rwo kwitegura, ikipe ya REG BBC yakoreye umwiherero w’icyumweru mu mujyi wa  Istanbul muri Turukiya aho yakinnye imikino 3 ya gicuti. Muri iyi mikino yatsinzemo ibiri itsindwa umwe.

Taliki 10 Gicurasi 2022, ikipe ya REG BBC yatsinze ikipe y’igihugu ya Kuwait amanota 77 kuri 67.

Mu mukino wa kabiri wabaye taliki 11 Gicurasi 2022, REG BBC yatsinzwe n’ikipe y’igihugu ya Bahrain  amanota 74 kuri 65 naho umukino wa nyuma wabaye taliki 12 Gicurasi 2022, ikipe ya REG BBC yitwara neza itsinda  ikipe y’igihugu ya Qatar amanota 89 kuri 53.

Iyi kipe ya REG BBC ku Cyumweru taliki 15 Gicurasi 2022 ni bwo yagarutse mu Rwanda. Iyi kipe kandi mu bakinnyi yakinishije mu mikino y’amajonjora yabereye i Dakar muri Senegal  hiyongereyemo Gasana Kenneth usanzwe amenyerewe mu ikipe y’igihugu y’u Rwanda ndetse na Abdoulaye Ndoye  waturutse muri  Senegal akaba yaravukiye muri Amerika.

Mu mikino y’amajonjora yo mu itsinda rya mbere “Sahara Conference”  yabereye i Dakar muri Senegal kuva taliki 05 kugeza 15 Werurwe 2022, ikipe ya REG BBC yasoje ari iya mbere mu makipe  6 yari yitabiriye aho yakurikiwe na US Monastir (Tunisia), AS Salé (Maroc) na SLAC (Guinea) ari yo  yanabonye itike ya ¼ cy’irangiza  cy’irushanwa rya BAL 2022.

Ba uwa mbere mu kumenya amakuru agezweho!!!