Ikipe ya REG VC yegukanye igikombe cy’Irushanwa rya Volleyball “Memorial Kayumba 2026” itsinze Gisagara VC amaseti 3-1 mu cyiciro cy’amakipe akina Icyiciro cya Mbere.

Ni irushanwa ryari rimaze iminsi ibiri ribera mu Karere ka Huye, by’umwihariko mu kigo cy’amashuri cya Groupe Scolaire Officiel de Butare cyasojwe ku Cyumweru, tariki ya 8 Werurwe 2026.

Yari inshuro ya 16 iri rushanwa riba mu rwego rwo kwibuka Padiri Kayumba Emmanuel, wabaye Umuyobozi wa Groupe Scolaire Officiel de Butare (Indatwa n’Inkesha), witabye Imana mu 2009.

Irushanwa ry’uyu mwaka ryari rigabanyije mu bice bine ari byo Volleyball, Koga, igisoro ndetse no gusiganwa ku magare.

Muri Volleyball harimo abagabo bakina muri Shampiyona y’icyiciro cya mbere, abagabo bakina Shampiyona y’icyiciro cya kabiri muri Kaminuza, amashuri y’Icyiciro Rusange (Tronc Commun) ndetse n’abakanyujijeho muri Volleyball.

Mu bagabo, REG VC yegukanye Igikombe cya Memorial Kayumba 2026 nyuma yo gutsinda Gisagara VC amaseti 3-1 (25-14, 25-20, 24-26, na 25-21) ku mukino wa nyuma.

Muri ½, REG y’Umutoza Benon Mugisha yari yatsinze Kepler VC amaseti 3-0 naho Gisagara VC itsinda East Africa University Rwanda amaseti 3-0.

Umwanya wa gatatu wegukanywe na East Africa University itsinze Kepler.

Mu bagore iri rushanwa ntiryabaye nyuma yaho Rwanda Revenue Authority ari yo kipe yonyine yitabiriye mu makipe arindwi yari yiyandishije ku ikubitiro.

Mu cyiciro cya kabiri Kinyinya yegukanye igikombe itsinze UR Huye amaseti 3-0 [0 25-21, 25-22 na 25-15].

Mu bakiri bato, Umutara Polytecics yegukanye igikombe itsinze Nyanza TSS amaseti 3-1 [25-12, 28-26, 16-25, 25-16] naho mu cyiciro Rusange cy’amashuri yisumbuye mu batarengeje imyaka 17, Regina Pacis yegukanye igikombe itsinze GSOB amaseti 3-2 (14- 25, 25-19, 25-20, 18-25, 15- 11).

Mu mukino wo gusiganwa ku magare bakina ibilometero umunani, mu bahungu batarengeje imyaka 16, Butwari Bob ni we wahize abandi naho mu bakobwa yabaye Ineza Butera Kevine.

Nyuma y’iyi mikino ubuyobozi bwa Groupe Scolaire Offiiciel de Butare buhagarariwe na Padiri Hakizimana Charles yavuze ko bazakomeza guteza imbere uburezi bijyana na Siporo.

Ati: “Turi ishuri rirera umwana kugira ngo aziteze imbere mu nzego zose haba mu bumenyi bushingiye ku ikoranabuhanga, uburere n’mpano yifitemo. Ibi biba bigamije guhuza abantu ari ishuri n’akarere Intego n’imwe.”

Ba uwa mbere mu kumenya amakuru agezweho!!!