Komiseri Mukuru w’Ikigo cy’Imisoro n’Amahoro (RRA), Niwenshuti Ronald, yatangaje ko mu mezi atanu kuva muri Nyakanga kugeza mu Ugushyingo 2025, hakusanyijwe imisoro ingana na miliyari 1 456.3 Frw, mu gihe intego yari miliyari 1 449.5 Frw.

Kuri uyu wa Gatanu tariki 12 Ukuboza nibwo hizihijwe ku nshuro ya 23 umunsi wo gushimira abasora, ku nsanganyamatsiko igira iti “Sora, Nsore, Twigire”. Hashimiwe ababye indashyikirwa mu byiciro bitandukanye, mwaka w’ingengo y’imari wa 2024/2025.

Komiseri Mukuru Niwenshuti yavuze ko mu 2024/25, RRA yakusanyije amafaranga agizwe n’imisoro n’andi atari imisoro angana na miliyari 3 099,0 Frw; ku ntego yari ifite ingana na miliyari 3 041,2 Frw.

Muri uyu mwaka w’ingengo y’imari wa 2025/26, RRA yahawe intego yo gukusanya angana na miliyali 3 728,2 Frw by’imisoro n’andi atari imisoro.

Ugereranyije n’umwaka wa 2024/25, ni izamuka rya 20.3% bingana na miliyali 629.2 Frw, kandi hari icyizere ko iyi ntego nayo izagerwaho.

Niwenshuti ykomeje ati “Mu mezi atanu ashize (Nyakanga-Ugushyingo) twashoboye gukusanya angana na miliyari 1 456,3 Frw, mu gihe umuhigo wari miliyari 1 449,5 Frw, ukaba waragezweho ku gipimo cya 100,5%, bivuze izamuka rya 22.0% ugereranije n’ umwaka ushize.

“Twakusanyirije kandi Uturere n’Umujyi wa Kigali, amafaranga angana na miliyari 39,4 Frw, mu gihe intego yari miliyari 37,7 Frw, intego ikaba yaragezweho ku gipimo cya 104,5%, izamuka rya 38,5% ugereranyije n’umwaka ushize.”

Minisitiri w’Intebe Dr Justin Nsengiyumva yavuze ko kuri Guverinoma, gushimira abasora atari “umuhango gusa”, ahubwo ari umwanya wo gushimira abantu n’ibigo bagaragaje indagagaciro zo gukorera mu mucyo, no kuba inyangamugayo mu gutanga umusoro uko bikwiye.

Yavuze ko u Rwanda nk’ibindi bihugu bikiri mu nzira y’iterambere, ruhanganye n’igabanuka ry’inkunga z’amahanga, aho mu myaka 15 ishize zavuye kuri 37% by’ingengo y’imari, ubu zigeze ku 8,3%.

Yavuze ko ari impuruza isaba kongera kongera imisoro iva mu gihugu nk’ingingi y’iterambere yizewe.

Yakomeje ati “Gusora ni igikorwa kigaragaza agaciro duha igihugu. Twibuke ko urugendo rwo kwigira k’u Rwanda atari inshingano z’abantu bake, ntabwo ari inshingano z’abo twashimiye uyu munsi gusa, ni umurimo wa twese. Umusoro wawe n’uwanjye, niyo nzira iduha kugira ubwigenge nyabwo.”

“Uko abasora bazagenda barushaho gusora neza, niko Leta izagenda irushaho kugabanya gukenera inkunga zo hanze, ndetse no kurushaho gushora imari mu bikorwa na serivisi dukeneye nk’abanyarwanda.”

Minisitiri w’Imari n’Igenamigambi Yusuf Murangwa, yavuze ko amafaranga RRA yinjije mu isanduku ya Leta mu 2024/2025 yagize uruhare rungana na 55,1% ku ngengo y’imari, ugereranyije na 44,7% mu myaka itanu ishize.

Yakomeje ati “Turashimira cyane ababigizemo uruhare bose, by’umwihariko abasora, kuba bakomeje kuba ku isonga mu gutuma ingamba za Guverinoma kwigira tuzigeraho, tunabasaba gukomeza gukora cyane kurushaho.”

Yijeje ko Guverinoma izakomeza gushyigikira ishoramari, aho mu ngengo y’imari y’uyu mwaka, 62.8% yahariwe ivugurura ry’ubukungu, byerekana icyizere cyo kwihutisha iterambere ry’ubukungu mu buryo burambye.

Umuyobozi w’Urugaga rw’Abikorera mu Rwanda, PSF, Jeanne Francoise Mubiligi, yashimiye RRA yateguye neza igikorwa cyo gushimira abasora.

Yanashimiye ubuyobozi bw’igihugu bukora ibishoboka ngo umutungo w’igihugu ucungwe neza nta guseseagurwa cyangwa kunyerezwa.

Yakomeje ati “Turashima ko imisoro dutanga igaragara mu bikorwa by’irerambere, kandi twishimira intambwe igihugu cyacu cyateye mu bikorwa bitandukanye. Umutekano, ubucuzi, uburezi n’ibindi. Ibi byose bifitiye abikorera akamaro kanini.”

Yashimiye abasora bahize abandi mu gusora neza, ko ari ishema ry’igihugu n’urugero ku bandi bikorera.

Abahembwe nk’indashyikirwa

Kuri uyu munsi hahembwe abasora 20, bakubiye mu byiciro birindwi bitandukanye.

Abacuruzi batoranyijwe hagendewe ku kuba usora atanga umusoro neza kandi ku gihe, kuba atarafatiwe mu makosa yo kunyereza imisoro, kuba akoresha neza ikoranabuhanga rya EBM mu gutanga inyemezabuguzi, no kuba adafite umwenda w’imisoro, yaba awufite, akaba yaragiranye amasezerano n’ubuyobozi bw’imisoro, y’uburyo azawishyura.

Umuguzi wa nyuma wabaye indashyikirwa, wiyemeje ko igihe cyose ahashye agomba gusaba fagitire ya EBM kandi akahava bayimuhaye, yabaye Maniragaba Elissa wo mu Mujyi wa Kigali.

Ba uwa mbere mu kumenya amakuru agezweho!!!