RSSB Tigers BBC igiye kwitabira imikino ya BAL 2026 ku nshuro ya mbere, yatangaje abakinnyi 12 izakoresha mu itsinda rya Kalahari Conference rizabera i Pretoria muri Afurika y’Epfo, kuva tariki ya 27 Werurwe kugeza ku ya 4 Mata 2026.

Iyi kipe y’Ikigo cy’Igihugu cy’Ubwiteganyirize yasimbuye APR BBC yikuye mu irushanwa iri mu itsinda rimwe na Al Ahly Tripoli yo muri Libya ifite igikombe giheruka, Petro de Luanda yo muri Angola, Dar City yo muri Tanzania, Nairobi City Thunder yo muri Kenya.

Mu bakinnyi 12 iyi kipe izifashisha harimo batandatu ba APR BBC bayobowe na Axel Mpoyo, Ntore Habimana, Ndizeye Dieudonne, Mangok Mathiang, Teafale Leonard Jr na Graig Leonard Randle. Aba bakinnyi biyongeraho umutoza James Maye Jr uzaba wungirije.

Abasanzwe muri Tigers ni Antino Jackson, Hagumintwari Steven, Bizimana Paul, Viny Okouo, Cyiza Chandelier wa Kepler BBC na Furaha Cadeaux de Dieu wa REG BBC.

Biteganyijwe ko iyi kipe izerekeza muri Afurika y’Epfo, ku wa Gatatu, tariki ya 25 Werurwe 2026.

Iri tsinda ryiswe Sahara Conference ririmo Fath Union Sport Rabat yo muri Maroc ahazabera irushanwa, Al Ahly yo mu Misiri, ASC Ville de Dakar yo muri Sénégal, Club Africain yo muri Tunisia, JCA Kings yo muri Côte d’Ivoire na Maktown Flyers yo muri Nigeria.

Amakipe umunani azitwara neza muri Kalahari na Sahara Conference, azahurira i Kigali mu Rwanda, aho azakinira imikino ya kamarampaka n’iya nyuma, iteganyijwe guhera tariki ya 22 kugeza 31 Gicurasi 2026.

Mu mwaka ushize wa 2025, na Al Ahli Tripoli ni yo yegukanye irushanwa itsinze Petro de Luanda ku mukino wa nyuma amanota 88-67.

Ba uwa mbere mu kumenya amakuru agezweho!!!