Sosiyete Nyarwanda ikora ubwikorezi bwo mu Kirere, RwandAir, yakiriye indege ebyiri za Boeing 737-800 mu rwego rwo gukomeza kwagura ibikorwa byayo.

Ni amakuru yatangajwe n’iyi sosiyete binyuze ku mbuga nkoranyambaga, kuri uyu wa Gatatu tariki ya 27 Kanama 2025.

Ubutumwa bwatangajwe n’iyo sosiyete bugira buti: “Twakiriye indege ebyiri zo mu bwoko bwa Boeing 737-800, imwe ikaba yarahageze mu ntangiriro za Kanama 2025 ndetse yatangiye gukora ingendo mu gihe indi yahageze mu ijoro ryo ku wa Kabiri.

RwandAir ivuga ko buri ndege ifite ubushobozi bwo gutwara abagenzi 174 ndetse zizajya zikorera ingendo ngufi n’izo hagati.

Boeing 737-800 ni indege ikorerwa muri Leta Zunze Ubumwe za Amerika. Yagiye bwa mbere ku isoko mu 1966.

Mu kwezi k’Ukwakira Ugushyingo mu 2022, ni bwo iyi sosiyete yaguze indege yayo ya mbere itwara imizigo ari yo Boeing B737-800SF ifite ubushobozi bwo kwikorera nibura toni 23. 

Ifite uburebure bwa metero 39,5 mu gihe kuva ku ibaba rimwe ugera ku rindi harimo intera ya metero 35,8 naho mu buhagarike ireshya na metero 12,6.

Mu 2024, RwandAir yatwaye imizigo ipima toni 6.113 zivuye kuri 4.595 mu mwaka wari wabanje, mu gihe mu 2022 zari toni 3.774 naho mu mwaka wari wabanje zari toni 3.889.

Iyi sosiyete kandi ifite gahunda yo kugura indi ndege yo muri ubu bwoko nyuma yo kubona ko hari abahinzi beza umusaruro mwinshi ariko ukabura uko ugezwe ku masoko.

RwandAir isanganywe izindi ndege zirimo enye za Boeing 737-800NG, ebyiri za Boeing 737-700NG, ebyiri za CRJ900NG, ebyiri za Bombardier Q-400NG n’ebyiri za Airbus A330.