Nyuma y’imikino y’amakipe y’ibihugu, mu bihugu bitandukanye, imikino ya Shampiyona yarakomeje mu mpera z’icyumweru gishize, bamwe mu bakinnyi b’Abanyarwanda bakina hanze bafashije amakipe yabo kwitwara neza nubwo hari abo shampiyona zabo zitahiriye.

Impera z’icyumweru zari nziza kuri Samuel Guelette ukinira La Louviere yo mu cyikiro cya kabiri mu Bubiligi yatsinze igitego cya mbere ku munota 22 ndetse atanga umupira wavuyemo igitego cya kane cyatsinzwe na Mouhamed Belkhier ku munota wa 74 mu mukino ikipe ye yanyagiyemo Lommel ibitego 5-1 mu mukino w’Umunsi wa 12 wa shampiyona ifata umwanya wa mbere n’amanota 26.

Impera z’icyumweru zari nziza kandı kuri Stade Tunisien yo mu cyiciro cya mbere muri Tunisia ikinamo Mugisha Bonheur yatsinze EGS Gafsa igitego 1-0 mu mukino w’umunsi wa cyenda wa shampiyona yakinnyemo iminota yose y’umukino ikipe ye ifata umwanya wa kane n’amanota 18.

Impera z’icyumweru zari nziza kuri Ishimwe Anicet ukinira Olympique de Béja yo mu cyiciro yari ku ntebe y’abasimbura mu mukino ikipe ye yatsinzwemo na US Monastir ibitego 3-1.

Mu gihugu cya Ukraine shampiyona yakomezaga hakinwa umunsi wa 13, ikipe ya FC Kryvbas Kryvyi Rih ikinamo Kapiteni w’Amavubi Bizimana Djihad yatsinze Obolon Kyiv igitego 1-0, yuzuza amanota 22 mu mikino 13 imaze gukina muri Shampiyona.

Djihad Bizimana ntiyakoreshejwe nyuma yaho yujuje amakarita atatu y’umuhondo atamwemera gukina umukino.

Myugariro Mutsinzi Ange ukinira FK Zira yo mu cyikiro cya mbere muri Azerbaijan yari ku ntebe y’abasimbura mu mukino ikipe ye yatsinzwemo na Neftci Baku PFK ibitego 2-1 mu mukino w’umunsi wa 14 wa shampiyona.

Myugariro w’ikipe y’igihugu, Imanishimwe Emmanuel ‘Mangwende’ ukinira AEL Limassol yo muri Cyprus yakinnye iminota yose y’umukino mu mukino ikipe ye yatsinzwemo na Aris Limassol ibitego 3-0 mu mukino w’umunsi wa 11 wa Shampiyona.

Myugariro Rwatubyaye Abdul ukinira Brera Strumica yo muri Macedonia y’Amajyaruguru yakinnye iminota yose y’umukino mu mukino ikipe ye yanganyijemo na FC Struga Trim igitego 1-1 mu mukino w’umunsi wa 15 wa shampiyona.

Rutahizamu Jojoe Kwizera ukinira Rhode Island yinjiye mu kibuga asimbuye ku munota wa 46 mu mukino ikipe ye yatsinzwemo na Colordo Springs Switchbacks FC ibitego 3-0 ku mukino wa nyuma wo guhatanira itike yo gukina icyiciro cya mbere Leta zunze ubumwe za Amerika “Major League Soccer”

Mu gihugu cya Kenya AFC Leopards ikinamo Rutahizamu Gitego Arthur yagombaga gukina na mukeba wayo Gor Mahia ariko uyu mukino waje gusubikwa kubera kubura ikibuga cyakwakira abafana b’impande zombi.

Umuzamu Ntwali Fiacre ukinira Kaizer chiefs yo muri Afurika y’Epfo ntibakinnye mu mpera z’icyumweru gishize ubwo bafite umukino wa shampiyona bazakiramo Richards Bay FC ku wa Gatatu tariki 27 Ugushingo 2024 saa moya z’igice z’umugoroba isaha ya Kigali.