Impuzamashyirahamwe y’Umupira w’Amaguru muri Afurika (CAF) yambuye ikipe y’Igihugu ya Senegal Igikombe cya Afurika cya 2025, nyuma yo kuyitera mpaga y’ibitego 3-0, gihabwa iya Maroc.

Uyu mwanzuro watangajwe mu ijoro ryo ku wa Kabiri tariki ya 17 Werurwe 2026, nyuma yo kumva ubujurire bwatanzwe na Maroc.

Ku wa 28 Mutarama 2026, ni bwo Komisiyo ishinzwe Imyitwarire muri CAF yafatiye ibihano bikomeye Ishyirahamwe rya Ruhago muri Sénégal no mu Bwami bwa Maroc.

Icyo gihe yahagaritse Umutoza Pape Thiaw n’abakinnyi batandukanye ku mpande zombi, kubera imvururu zaranze umukino wa nyuma w’Igikombe cya Afurika cya 2025 wabereye i Rabat ku wa 18 Mutarama 2026.

Uyu mwanzuro ntabwo wanyuze Maroc kuko yahise ijya kujurira, birangira ihawe ubutabera bwo guhabwa igikombe nk’uko byatangajwe na CAF binyuze mu itangazo yashyize hanze.

Yagize iti: “Akanama gashinzwe Ubujurire muri CAF kashingiye ku Ngingo ya 84 y’Amategeko y’Igikombe cya Afurika (AFCON), kemeza ko Ikipe y’Igihugu ya Sénégal iterwa mpaga ku mukino wa nyuma w’Igikombe cya Afurika cya 2025 muri Maroc, ku bitego 3-0 by’Ishyirahamwe rya Ruhago muri Maroc FRMF.”

Mu bindi byemezo byafashwe, Ismaël Saibar ukinira Maroc wari wahagaritswe imikino itatu akanacibwa amande y’ibihumbi 100 by’Amadolari (asaga miliyoni 145 Frw), ibyo bihano byakuweho ariko ahanwa kudakina imikino ibiri ya CAF harimo umwe usubitse.

Maroc yegukanye Igikombe cya Afurika cya 2025, yari yaciwe kandi ibihumbi 15 by’amadolari (miliyoni 21 Frw) kubera abafana bakoresheje urumuri (lasers) batunga mu maso y’abakinnyi muri uwo mukino, na yo yagabanyijwe aba ibihumbi 10 by’amadolari.

Ishyirahamwe ry’Umupira w’Amaguru muri Maroc (FRMF) yari yaciwe ibihumbi 200 by’amadolari (miliyoni 291 Frw) kubera imyitwarire idakwiye yaranze abana batoragura imipira ku kibuga muri uwo mukino, ariko yagabanyijwe aba ibihumbi 50 by’amadolari.

Ibihumbi 100 by’amadolari (miliyoni 145 Frw) yari yaciwe kubera imyitwarire y’abakinnyi b’ikipe y’Igihugu ya Maroc n’abatoza bagiye mu cyumba cya VAR kubangamira abasifuzi, kandi bikaba bihabanye n’ingingo ya 82 n’iya 83 mu mategeko ngengamyitwarire CAF igenderaho, byagumyeho.

Ba uwa mbere mu kumenya amakuru agezweho!!!