Kuva taliki 4 kugeza 11 Ugushyingo 2022  i Sarajevo muri Bosnie Herzegovine habereye shampiyona y’Isi  mu mukino wa Volleyball ikinwa n’abantu bafite ubumuga “Sitting Volleyball World Championships 2022”.

Ikipe y’u Rwanda mu bagore yasoreje ku mwanya wa 8 mu makipe 13 yari yitabiriye naho mu bagabo, ikipe y’u Rwanda isoreza ku mwanya wa 13 mu makipe 16 yari  yitabiriye.

Uko amakipe y’u Rwanda yitwaye

Mu bagore, ikipe y’u Rwanda yari mu itsinda A hamwe na Bosnie Herzegovine, Ukraine, Hongria na Pologne.

Mu mikino y’amajonjora, ikipe y’u Rwanda yitwaye neza itsinda imikino yose aho yatsinze Pologne amaseti 3-1 (26-24, 23-25, 25-15 na 25-17), itsinda Bosnie Herzegovine amaseti 3-0  (25-10, 25-9 na 25). Iyi kipe y’u Rwanda yatsinze Ukraine amaseti 3-2 (10-25, 25-23, 25-21, 16-25 na 15-9) inatsinda Hongria amaseti 3-1 (25-14,25-18,21-25 na 25-21).

Muri ¼ cy’irangiza, ikipe y’u Rwanda yatsinzwe na Slovenia amaseti 3-0 (25-20, 25-8 na 26-24).

Mu guhatanira imyanya (5-8), ikipe y’u Rwanda  yatsinzwe n’u Butalitani amaseti 3-0 (25-17, 25-8 na 25-8). Mu guhatanira umwanya wa 7 na 8  iyi kipe  y’u Rwanda yatsinzwe na Ukraine amaseti 3-0 (25-18, 25-18 na 29-27).

Muri iki cyiciro, ikipe ya Brazil ni yo yegukanye igikombe itsinze Canada ku mukino wa nyuma amaseti 3-2 (25-23, 18-25,21-25, 25-17 na 15-6) naho umwanya wa 3 wegukanwa na USA itsinze Slovenia amaseti 3-0 (25-8,25-14 na 25-10).

Uko amakipe yakurikiranye

Ikipe ya Brazil yegukanye umwanya wa mbere ikurikirwa na Canada (2), USA (3), Slovenia (4), u Butaliyani (5), u Budage (6), Ukraine (7), Rwanda (8), Iran (9), Finland (10), Hongiria (11), Pologne (12), ikipe ya Bosnie Herzegovine   yasoreje ku mwanya wa nyuma wa 13.

Ikipe y’u Rwanda mu bagore  yaherukaga kwitabira shampiyona y’Isi muri 2018 aho yari ku mwanya wa 11 mu makipe 16.

Mu bagabo, ikipe y’u Rwanda yari mu itsinda D hamwe na Misiri, Ukraine n’u Buholandi. Mu mikino y’amajonjora  ikipe y’u Rwanda mu bagabo yatsinzwe na  Ukraine amaseti 3-0 (25-20, 25-15 na 25-22), yatsinzwe n’u Buholandi amaseti 3-2 (20-25,25-20,25-22, 23-25 na 15-11) inatsindwa na Misiri amaseti 3-0 25-19, 25-15 na 25-12).

Iyi kipe y’u Rwanda yatsinzwe na Brazil amaseti 3-0 (25-20, 25-15 na 25-22) ibura itike yo gukomeza muri ¼ cy’irangiza ikomeza mu mikino yo guhutanira imyanya hagati ya 9 na 16.

Umukino wa mbere, ikipe y’u Rwanda yatsinzwe na Canada amaseti 3-1 (20-25, 29-27, 25-12  na 25-22). Mu wundi mukino, iyi kipe y’u Rwanda yitwaye neza itsinda u Buyapani amaseti 3-0 (25-22, 25-22 na 25-21)

Ikipe y’u Rwanda yatsinze ikipe y’u Buholandi amaseti 3-0 (25-22, 25-19 na 29-27) yegukana umwanya wa 13 naho ikipe y’u Buholandi ifata umwanya wa 14.

Muri iki cyiciro, ikipe ya Iran yegukanye igikombe itsinze Bosnie Herzegovine amaseti 3-0 (26-24, 32-30 na 25-12) naho ikipe ya Brazil yegukana umwanya wa 3 itsinze Misiri amaseti 3-1 (25-21,20-25, 25-23 na 26-24).

Uko amakipe yakurikiranye

Iran yegukanye umwanya wa mbere ikurikirwa na  Bosnie Herzegovine (2), Brazil (3), Misiri (4), u Budage (5), USA (6), Kazakhstan  (7), Ukraine (8), Iraq  (9), Croatia (10), Canada (11), Poland (12), Rwanda (13), u Buholandi (14), Seribia (15), ikipe y’u  Buyapani isoreza  ku mwanya wa nyuma wa 16.

Ubwo ikipe y’u Rwanda mu bagabo yaherukaga muri shampiyona y’Isi muri 2018  yasoreje ku mwanya wa nyuma wa 16.

Ba uwa mbere mu kumenya amakuru agezweho!!!