U Rwanda na Saudi Arabia byasinyiye guteza imbere ikoranabuhanga 
Ikoranabuhanga

U Rwanda na Saudi Arabia byasinyiye guteza imbere ikoranabuhanga 

NTAWITONDA JEAN CLAUDE

February 1, 2024

Ikigo cy’u Rwanda gishinzwe Ikoranabuhanga mu Itumanaho n’Isakazabumenyi (RISA) cyasinyanye amasezerano y’ubufatanye n’Ikigo cya Saudi Arabia gishinzwe Ikoranabuhanga, agamije guteza imbere ikoranabuhanga mu bihugu byombi. 

Ni amasezerano yashyizweho umukono ubwo habaga Inama ya 3 y’Inteko Rusange y’Umuryango w’Ubutwererane mu by’Ikoranabuhanga (DCO), i Manama mu Bwami bwa Bahrain. 

Ikigo RISA kibona ayo masezerano nk’intambwe ikomeye mu bufatanye bw’u Rwanda na Saudi Arabia bugamije impinduramatwara mu by’ikoranabuhanga. 

Iyi nama yasoje ku wa Gatatu tariki ya 31 Mutarama 2024 hatangizwa gahunda zitandukanye mu by’ikoranabuhanga hagati y’ibihugu bihuriye muri uwo Muryango. 

Yayobowe na Minisitiri w’Ubwikorezi n’Ikoranabuhanga mu Bwami bwa Bahrain Mohamed bin Thamir Al Kaabi, ikaba yitabiriwe n’intumwa z’ibihugu 16 biburiye muri uyu Muryango harimo n’u Rwanda. 

Ibyo bihugu bifite Umusaruro Mbumbe (GDP) ukomatanyije wa tiriyari 3.5 z’amadolari y’Amerika, byaganiriye  ku guteza imbere isoko ryambukiranya imipaka, agaciro k’amakuru abikwa mu buryo bw’ikoranabuhanga, ubukungu bwa muntu burambye bwifashisha ikoranabuhanga ndetse n’ubutwererane mpuzamahanga butanga umusaruro muri urwo rwego. 

Baganiriye kandi ku iterambere ry’ubucuruzi bwifashisha ikoranabuhanga, ishoramari no guhanga imirimo byose bigamije kwihutisha icyerekezo cy’iterambere rishingiye ku ikoranabuhanga. 

U Rwanda n’ibindi bihugu bihuriye muri uwo Muryango byongeye gushimangira ukwiyemeza kwa byo mu kubaka no gushyigikira imikorere ya DCO, bizirikana ko byose bihuriye ku ntego y’iterambere rishingiye ku ikoranabuhanga. 

Abahagarariye ibihugu byabo bashimangiye akamaro k’ubutwererane mpuzamahanga mu by’ikoranabuhanga no kwihutisha iterambere rirambye kandi ritagira n’umwe riheza ku Isi yose. 

Nanone kandi ibihugu bihuriye muri uyu Muryango byiyemeje gukumira ko icyuho mu mikoreshereze y’ikoranabuhanga cyaba imbigamizi aho kubaka ikiraro hagati y’abakire n’abakene ngo bose baryoherwe n’amahirwe ritanga.

Ibyo bihugu bisanga kugira ngo Ikoranabuhanga rifashe mu rugendo rwo kugera ku Ntego z’Iterambere Rirambye (SDGs) bisaba ubutwererane budacogora bw’inzego zishinzwe kwimakaza ikoranabuhanga muri buri gihugu, mu bigo by’ubucuruzi no hagati y’abantu ubwabo. 

Ibihugu bihuriye muri uyu Muryango kandi byatangije gahunda nshya yo kubaka Ibigo by’Icyitegererezo by’Ikiranabuhanga ry’Ubwenge Muntu Buhangano (DCO GenAI Center of Excellence Initiative) bizajyana no kubihuza hifashishijwe ikoranabuhanga rigezweho. 

Izindi gahunda zatangajwe mu kwimakaza ubutwererane mu by’ikoranabuhanga harimo iyo Gushinga Ambasade y’Amakuru abikwa ku Ikoranabuhanga, ndetse na Gahunda yimakaza ubusugire n’ubuziranenge bw’umutungo mu by’ubwenge buri kuri murandasi. 

Nanone kandi Inteko Rusange ya DCO yatangarijwemo abemerewe guhagararira ibihugu byabo n’indorerezi 17 baturutse mu nzego n’ibihugu bitandukanye, byose bishimangira ukwiyemeza mu kwimakaza ubutwererane mu by’ikoranabuhanga, no kuziba icyuho mu mikoreshereze yaryo. 

Umunyamabanga Mukuru wa DCO Deemah AlYahya, yashimiye Guverinoma ya Bahrain yakiriye inama y’Inteko Rusange y’uyu mwaka n’ibihugu byayitabiriye bikaba byaranataze inkunga ishoboka mu mwaka wose. 

Yavuze ko uyu munsi hakenewe ubufatanye n’ubutwererane buhamye mu bafatanyabikorwa bose, mu gihe Isi ihanganye n’ubusumbane bushingiye ku ikoranabuhanga rigezweho nka AI. 

Yagize ati: “Mu bufatanye, dushobora guharanira ko iterambere nta n’umwe riheza kandi rikaba rirambye tubihisemo, atari amahirwe. Dufite ibisabwa n’impano byadufasha kubaka ikiraro kiziba icyuho cy’ubusumbane mu ikoranabuhanga, duharura amayira y’aho nta n’umwe usigara inyuma.”

Umuryango DCO washinzwe mu mwaka wa 2020, kuri ubu uhuriza hamwe Minisiteri z’Ikoranabuhanga n’Itumanaho zo mu bihugu 16 ari byo Bahrain, Bangladesh, Cyprus, Djibouti, Gambia, Ghana, Greece, Ubwami bwa Yorodaniya, Kuwait, Morocco, Nigeria, Oman, Pakistan, Qatar, u Rwanda, na Saudi Arabia.

Ni Umuryango wibanda ku guteza imbere urubyiruko, abagore na ba rwiyemezamirimo basogongezwa ku mbaraga zo kwihutisha iterambere ry’ubukungu bushingiye ku ikoranabuhanga. 

Biteganyijwe ko Inteko Rusange y’Umwaka utaha izabera mu Bwami bwa Hashemite bwa Yirodaniya muri Gashyantare 2025, nk’Igihugu cyahawe kuyobora uyu Muryango muri uyu mwaka. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA