Guverinoma y’u Rwanda n’Ikigega Mpuzamahanga giteza imbere Ubuhinzi n’Ubworozi (IFAD) basinye amasezerano y’inkunga angana na miliyoni 78.5 z’amadolari ya Amerika ni ukuvuga angana na miliyari zisaga 114,7 igamije guteza imbere urwego rw’ubuhinzi n’ubworozi.

Iyi nkunga izifashishwa mu kuhira imyaka ku misozi mu Karere ka Kayonza no guteza imbere urwego nyongeragaciro rw’amatungo magufi.

Intego ni ukugabanya ubukene, kongera umutekano w’ibiribwa, kuzamura ubushobozi bwo guhangana n’imihindagurikire y’ikirere mu buhinzi no kongera amafaranga yinjira mu miryango iherereye mu cyaro.

Icyo kigega gisanzwe kigira uruhare mu guteza imbere ubuhinzi n’ubworozi binyuze mu mishinga itandukanye ya Minisiteri y’Ubuhinzi n’Ubworozi (MINAGRI).

Muri yo hari nk’uwa PRISM wibanda ku guteza imbere ubworozi bw’amatungo magufi, kubaka ibikorwa remezo nk’amavuriro y’amatungo, amasoko yayo n’amabagiro. Watangiye mu 2020/2021 mu Turere 15 ari two Ruhango, Huye, Gisagara, Nyaruguru, Nyamagabe, Nyamasheke, Karongi, Rutsiro, Nyabihu, Ngororero, Musanze, Burera, Gicumbi, Gakenke na Rulindo.

Uwo mushinga ufite intego yo gufasha abaturage kwikura mu bukene.

Undi mushinga uterwa inkunga na IFAD, Ugamije Guteza Imbere Ubworozi bw’inka z’umukamo mu Rwanda (RDDP: Rwanda Diary Development Project) watangijwe na Leta y’u Rwanda mu rwego rwo gufasha aborozi kunoza ibikorwa byo gukusanya, gutunganya no gukwirakwiza amata mu buryo bubyarira inyungu aborozi.

Bimwe mu bikorwa byakozwe harimo kubaka amakusanyirizo y’amata manini n’amato hirya no hino mu Gihugu.

Undi mushinga ni KWIIP (Kayonza Irrigation and Integrated Watershed Management Project) wibanda ku bikorwa byo kuhira imyaka by’umwihariko mu Mirenge ya Ndego na Kabare ahakunze kuba amapfa, gusa ukaba uzanagezwa no mu yindi Mirenge yako Karere.

Ikigega IFAD kuva cyashingwa mu 1978, cyiyemeje gutera inkunga ibikorwa by’ubuhinzi n’ubworozi bitandukanye hirya no hino ku Isi hagamijwe ko abantu bihaza mu biribwa n’ibikomoka ku matungo.

Ba uwa mbere mu kumenya amakuru agezweho!!!