Itsinda ryamamaye ku Isi rya UB40 riri kumwe n’umuhanzi uzwi ku ijwi ryiza Ali Campbell, rigiye gutaramira bwa mbere mu Rwanda mu gitaramo kizabera muri BK Arena.

Ni igitaramo kiri mu ruhererekane rw’ibitaramo byabo bise “The Big Love Tour” bateganya gukora mu ijoro ry’itariki 9 Kamena 2026, i Kigali mu rwego rwo guhuza urukundo, amahoro n’ubumwe, indangagaciro za Reggae yamamaje kuva mu myaka myinshi ishize.

Ni igitaramo cyategujwe n’ubuyobozi bw’inyubaka ya BK Arena ibinyujije ku mbuga nkoranyambaga zabo bishimangirwa n’iryo tsinda ryahise rishyira integuza yacyo ku mbuga nkoranyambaga zaryo.

Ni inkuru yakiriwe neza n’abakunzi b’umuziki mu Rwanda bari basanzwe barihebeye abo bahanzi kubera gukurikira ibihangano n’ibitaramo byabo bari basanzwe bakorera i Burayi no muri Amerika.

Ku bakuriye umuziki wo mu bihe byo hambere bazi indirimbo za UB40, bizaba ari ugusubira mu bihe byiza; ku rubyiruko, bizaba ari amahirwe yo kubona imbona nkubone itsinda ryanditse izina mu mateka ya reggae.

Iryo tsinda kandi ryashingiwe mu Bwongereza mu 1978, rikaba ryarahinduye isura ya reggae riyihuza n’indi njyana nka pop na dub, bituma irenga imbibi z’ibirwa bya Jamaica ikwira Isi yose.

Ali Campbell we yabaye ijwi nyamukuru ry’iri tsinda imyaka myinshi, ni umwe mu batumye UB40 iba ikimenyabose ku rwego mpuzamahanga.

UB40 yamenyekanye ku ndirimbo zirimo Red Red Wine, Kingston town, I can’t help fall in love with you, Please don’t make me Cry n’izindi zakunzwe.

Biteganyijwe ko icyo gitaramo kizaba tariki 9 Kamena 2026, aho u Rwanda rukomeje gushimangira ko ari igicumbi cyo kwakira ibitaramo n’inama mpuzamahanga.

Ba uwa mbere mu kumenya amakuru agezweho!!!