Abahanzi n’ibyamamare batandukanye bakomoka muri Kirehe n’abatahavuka barimo Senderi International Hit, Massamba Intore, Platini P na Mico the Best n’abandi, batanze ibyishimo mu gitaramo ‘Kirehe Twataramye’ cyahirijwemo ubuhanzi n’ubukerarugendo.

Ni igitaramo cyari kibaye ku nshuro ya mbere, tariki 27 Ukuboza 2025, kibera mu Murenge wa Nyarubuye mu Karere ka Kirehe mu rwego rwo gufasha abakiri bato bahatuye kurushaho kumenya amateka y’aho bakomoka.

MC Natete Brian ni we wayoboye icyo gitaramo mu gice cya mbere cyayo cyaranzwe no gutanga umwanya ku bahanzi bakizamuka bo muri aka Karere basusurutsa abitabiriye mu gihe harimo abandi barimo gusura ibirimo umusaruro n’ibindi byiza nyaburanga bisangwa mu Karere ka Kirehe.

Buri muhanzi yageraga ku rubyiniro akakiranwa urugwiro, akaririmba indirimbo ze zitandukanye arinako abitabiriye baririmbana n’abo.

Ageze ku rubyiniro  Senderi Hit ibintu byahinduye isura kuko yaririmbaga abaha amafaranga mu rwego rwo kubaha umwaka mushya.

Uwo muhanzi wari mu bateguye icyo gitaramo yavuze ko bateganya ko icyo gitaramo cyaba ngarukamwaka ibyiza n’amateka bya Nyarubuye bikwiye kumenyekana.

Yagize ati: “Iyi tariki ya 27 Ukuboza, buri mwaka turashaka ko tuzajya dutaramira muri aka Karere kuko akenshi Kirehe ntihagera ibindi bitaramo bikomeye, ni yo mpamvu rero tugomba kujya tubataramira.”

Yakomeje agira ati: “Nyarubuye yamenyekanyeho amateka mabi mu myaka 31 ishize, harageze ngo n’ibyiza biharangwa bimenyekane abahatuye bishime.”

Igitaramo cyasojwe na Platini P aririmba indirimbo ze zakunzwe, abafana baramukundira bakajya bamufasha kuri buri ndirimbo. 

Uretse abahanzi bataramiye abitabiriye icyo gitaramo cyitabiriwe n’ibindi byamamare biganjemo abavuka muri ako Karere  barimo Nyambo, Ndimbati, Nick, Isimbi n’abandi.

Umuyobozi w’Akarere ka Kirehe, Rangira Bruno, yashimiye abahanzi batandukanye bitabiriye iki gitaramo, yizeza abaturage ko buri mwaka bazajya bakora igitaramo cya “Kirehe Twataramye” mu kwishimira ibiba byaragezweho.

Ba uwa mbere mu kumenya amakuru agezweho!!!