Ubushakashatsi bw’Urwego rw’Igihugu rw’Imiyoborere (RGB), ku gipimo cy’Iterambere ry’itangazamakuru mu Rwanda, Rwanda Media Barometer (RMB2024), bwongeye kugaragaza ko ubukene mu itangazamakuru n’ubushobozi bw’abarikora bukira hasi.

Ibyo ngo bidindiza uwo mwuga w’ingirakamaro mu rugendo rw’iterambere ry’abaturage n’Igihugu muri rusange, aho iterambere ry’itangazamakuru n’ubushobozi bwaryo mu bunyamwuga biri kuri 60,7%.

Ubwo bushakashatsi bwamuritswe kuri uyu wa Kane tariki ya 7 Ugushyingo 2024, bukorwa buri myaka ibiri, ubwo u Rwanda rwifatanyaga n’Isi kwizihiza Umunsi Mpuzamahanga Nyafurika w’Itangazamakuru.

Iki gipimo kigaragaza ingeri eshanu zagenzuwe nk’izashingiweho mu kwerekana imiterere y’urwego rw’itangazamakuru mu Rwanda.

Ni ibushakashatsi uko imyaka igenda ikurikira bugaragaza ko itangazamakuru ry’u Rwanda ribangamiwe bikomeye n’amikoro make y’abarikora bityo ntirikorwe kinyamwuga.

Jean Bosco Rushingabigwi, Umuyobozi w’ishami rishinzwe guhuza ibikorwa by’itangazamakuru mu Rwego rw’Igihugu rw’imiyoborere (RGB), agaragaza ko kimwe mu bitera iki kibazo ari uko usanga ba nyiribitangazamakuru amafaranga bakuramo batagira ubushake bwo kongera kuyashoramo ngo gitera imbere.

Yagize ati: “Tuvuga ubushobozi buke bw’amafaranga ariko ubushakashatsi bukagaragaza ko hari Radiyo 30 zimaze imyaka myinshi zikora, barinjiza ahubwo ntabwo bayabagarura mu mwuga, hari ikigaragaza ko amafaranga yinjira ariko agakoreshwa ukundi.”

Akebura n’abanyamakuru bakeneye guhembwa menshi ngo bakore akazi ndetse asaba n’ababaha ubumenyi bakihatira kubigisha neza.

Ati: “Tuvuge no ku bushobozi bw’ubumenyi, tutaveba na ba nyir’ibitangazamakuru, ese wowe ko usaba guhembwa miliyoni 2 z’amafaranga y’u Rwanda, ubushobozi ufite ni ubuhe.”

Rushingabigwi yavuze ko abigisha bagomba gutanga ubumenyi buhagije ku biga itangazamakuru babihuza n’ibiri ku isoko bityo na wa mukoresha w’abanyamakuru mu gihe yinjiza amafaranga yibuke abatumye yinjiza.

Ku ruhande rw’abanyamakuru bavuga ko igitera ubwo bushobozi buke mu itangazamakuru ari uko usanga nta bikorwa byo kwamamaza babona ku bwinshi ngo bifashe ibitangazamakuru kwinjiza amafaranga bityo na bo bahembwe neza.

Hakizimana Daniel, ukorera Flash Fm na Flash TV, yagize ati: “Abantu babaho kuko babonye ibintu byo kwamamaza, isoko ryacu ni rito ariko n’abaje kwamamaza ntabwo barumva igisobanuro cyo kwamamaza mu itangazamakuru, n’ugerageje kubyumva ni uguhita ajya kwamamaza mu bitangazamakuru bya Leta. Ni byiza ko Leta yaharira ibindi bitangazamakuru byigenga bikabona amakosa.”

Mu bindi ubwo bushakashatsi bwa RGB bwagaragaje hari igipimo kijyanye n’urwego rw’amategeko agenga itangazamakuru bwagaragaje ko anyuze abakora uyu mwuga ku kigero cya 90,0%.

Kuba itangazamakuru ryo mu Rwanda rigena umurongo rikoreramo n’ibyo ritangaza kimwe no gufungura ibinyamakuru biri kuri 72,3%; itangazamakuru nk’umuyoboro ufasha mu miyoborere myiza na demokarasi biri kuri 81,3%; iterambere ry’itangazamakuru n’ubushobozi bwaryo mu bunyamwuga biri kuri 60,7% naho kugerwaho n’amakuru biri kuri 79,1%.