Arsenal yatsinze Club Brugge ibitego 3-0 naho Manchester City itsinda Real Madrid ibitego 2-1 mu mikino isoza iy’Umunsi wa gatandatu wa UEFA Champions League, yabaye ku wa Gatatu , tariki ya 10 Ukuboza 2025.

Umukino wari utegerejwe wahuje Real Madrid yari yakiriye Manchester City kuri Stade Santiago Bernabéu.

Real Madrid imbere y’abafana bayo ni yo yatangiye umukino iri hejuru ndetse ku munota wa 3 yibwiraga ko yabonye Penaliti ku ikosa Matheus Nunes yakoreye Vinicius Jr mu rubuga rw’amahina ariko VAR yemeza ko ryabereye hanze batanga Coup franc itagize ikivamo.

Ku munota wa 28, Real Madrid yafunguye ku mupira mwiza Jude Bellingham yahaye Rodrigo awinjirana mu rubuga rw’amahina ahita atera ishoti rikomeye umupira uruhukira mu rushundura.

Ku munota 35, Manchester City yabonye igitego cyo kwishyura ku mupira wavuye kuri koruneri yatewe na Rayan Cherki ushyirwa ku mutwe na Josko Gvardiol ugarurwa nabi n’umunyezamu Thibaut Courtis usanga Nico O’Reilly wari uhagaze neza awushyira mu izamu.

Iyi kipe yo mu Bwongereza, Manchester City yakomeje gukina neza irusha cyane Real Madrid mu guhererekanya umupira hagati mu kibuga.

Ku munota wa 40, Myugariro Antonio Rudiger wa Real Madrid yasunitse Erling Haaland mu rubuga rw’amahina, umusifuzi yemeza ko ari penaliti.

Iyi penaliti yinjijwe neza na Erling Haaland atsindira Manchester City igitego cya kabiri.

Igice cya mbere cyarangiye Manchester City yatsinze Real Madrid ibitego 2-1.

Mu gice cya kabiri, Manchester City yakomeje gukina neza ibona uburyo butatu bukomeye burimo ubwa Jérémie Dokou, ariko umunyezamu Thibaut Courtois akomeza kuba ibamba.

Ku munota wa 75, Rodrygo yahinduye umupira mwiza mu rubuga rw’amahina, usanga Vinícius Júnior wawukinnye n’umutwe, ku bw’amahirwe ye make ujya ku ruhande rw’izamu.

Real Madrid yongeye guhusha uburyo bwabazwe ku munota wa 84 ku mupira wahinduwe na Alvaro Fernandez Carreras, ushyizweho umutwe na Endrick ukubita umutambiko w’izamu ujya hejuru.

Umukino warangiye Manchester City itsinze ibitego 2-1, ifata umwanya wa kane n’amanota 13 mu gihe Real Madrid iri ku mwanya wa karindwi n’amanota 12.

Arsenal yatsinze Club Brugge ibitego 3-0 harimo bibiri byatsinzwe na Noni Madueke na Gabriel Martineli, yuzuza umukino wa gatandatu wikurikiranya itsinda muri iri rushanwa n’amanota 18 kuri 18.

Paris Saint-Germain yanganyije na Athletic Club ubusa ku busa, igira amanota 13 ku mwanya wa gatatu, irushwa amanota abiri na Bayern Munich ya kabiri.

Uko indi mikino yakinwe yagenze:

Qarabag FK 2-4 Ajax

Villarreal FC 2-3 FC Copenhagen

Athletic Club 0-0 Paris Saint-Germain

Bayer Leverkusen 2-2 Newcastle United

Benfica 2-0 Napoli

Borussia Dortmund 2-2 Bodoe/Glimt

Juventus 2-0 Pafos FC

Umunsi wa karindwi wa UEFA Champions League uzakinwa tariki 20 n’iya 21 Mutarama 2026.

Ba uwa mbere mu kumenya amakuru agezweho!!!