Imikino ya UEFA Champions League yakomeje gukinwa aho FC Barcelona yanyagiye Newcastle United ibitego 7-2, Liverpool itsinda Galatasaray ibitego 4-0, zombi zigera muri ¼ cy’iri rushanwa rihuza amakipe yabaye aya mbere iwayo ku Mugabane w’u Burayi. Iyi mikino yo kwishyura yabaye mu ijoro ryo ku wa Gatatu, tariki ya 18 Werurwe 2026.

Umukino wabimburiye indi kandi wari utegerejwe na benshi wahuje FC Barcelona yo muri Espagne yakiriye Newcastle United yo mu Bowngereza bari banganyije igitego 1-1 mu mukino ubanza

Iyi kipe yo mu Espagne yitwaye neza kuko yayinyagiye ibitego 7-2, iyisezerera ku giteranyo cy’ibitego 8-3. Ni ibitego byatsinzwe na Raphinha watsinzemo 2 anganya na Robert Lewandowski, Marc Bernal, Lamine Yamal na Fermin Lopez. Ni mu gihe Newcastle United yatsindiwe na Anthony Elanga.

Undi mukino wari uhanzwe amaso ni uwo Liverpool yakiriyemo Galatasaray kuri Anfield Road. Umukino ubanza iyi kipe yo muri Turikiya yari yatsinze igitego 1-0.

The Cops yajyanye imbaraga nyinshi muri uyu mukino, ku munota wa 25 Dominik Szoboszlai afungura amazamu, akorerwa mu ngata na Hugo Ekitike, Ryan Gravenberch na Mohamed Salah wabaye
Umunyafurika wa mbere wujuje ibitego 50 muri UEFA Champions League. Umukino warangiye Liverpool yanyagiye Galatasaray ibitego 4-0, iyisezerera ku giteranyo cy’ibitego 4-1.

Indi mikino yabaye kuri uyu munsi, Bayern Munchen yanyangiye Atalanta ibitego 4-1, iyisezerera ku giteranyo cy’ibitego 10-2 mu gihe Tottenham yatsinze Atletico Madrid ibitego 3-2, ariko isezererwa ku giteranyo cy’ibitego 7-5.

Imikino ibanza ya ¼ iteganyijwe tariki ya 7 na 8 Mata, mu gihe iyo kwishyura ari ku ya 14 na 15 Mata 2026.

Dore uko imikino iteganyijwe:

Real Madrid vs Bayern Munich

Sporting Lisbon vs Arsenal

FC Barcelone vs Atlético Madrid

PSG vs Liverpool

Ba uwa mbere mu kumenya amakuru agezweho!!!