Real Madrid yatsinze Manchester City ibitego 3-0 naho Paris Saint-Germain itsinda Chelsea ibitego 5-2 mu mikino ibanza ya ⅛ cya UEFA Champions League. Iyi mikino yabaye mu ijoro ryo ku wa Gatatu, tariki ya 11 Werurwe 2026.

Umukino wari utegerejwe na benshi wabereye kuri Estadio Bernabeu hagati ya Real Madrid yo muri Espagne na Manchester City yo mu Bwongereza. Ni umukino watangiye wihuta ku mpande zombi, umupira uva ku izamu rimwe ujya kuri irindi. Mu minota 15, Manchester City yongereye imbaraga itangira gusatira izamu rya Real Madrid ishaka gufungura izamu.

Ku munota wa 20’ Real Madrid yafunguye amazamu ku mupira muremure wavuye ku munyezamu Thibaut Courtois, Federico Valverde arawufata asiga ba myugariro ba Manchester City awushyira mu rushundura.

Iyi kipe yakomeje gukina neza bidatsinze ku munota wa 27 yabonye igitego cya kabiri cyinjijwe na Federico Valverde ku kazi gakomeye kakozwe na Vinicius Junior.

Mu minota 35, Manchester City yihariye umupira hagati mu kibuga, isatira cyane ishaka kwishyura harimo Koruneri eshatu zikurikiranya yabonye, ariko ubwugarizi bwa Real Madrid bukomeza guhagarara neza.

Ku munota wa 42’ Federico Valverde yatsinze igitego cya gatatu muri uyu mukino ku mupira mwiza yacomekewe na Brahim Diaz, awushyira mu izamu. Igice cya mbere cyarangiye Real Madrid itsinze Manchester City ibitego 3-0.

Iyi kipe y’i Madrid yakomeje gukina neza mu igice cya kabiri ndetse ku munota wa 47 yashoboraga gutsinda igitego cya kabiri ku ishoti rikomeye ryatewe na Brahim Diaz, umupira ukurwamo neza n’umunyezamu Gianluigi Donnarumma.

Ku munota wa 56’ Vinicius Junior yatezwe mu rubuga rw’amahina n’umunyezamu Gianluigi Donnarumma, umusifuzi yemeza ko ari Penaliti. Iyi Penaliti yatewe Vinicius Junior, kubw’amahirwe make umunyezamu Gianluigi Donnarumma uwukuramo.

Ku munota wa 70’ Umutoza wa Manchester City yakoze impinduka Bernardo Silva na Antoine Semenyo basimburwa na Rayan Cherki na Rayan Ait-Nouri.

Izi mpinduka zafashije iyi kipe kongera imbaraga mu busatirizi harimo uburyo bwabazwe Nico O’Reilly yahushije ku mupira yateye ari mu rubuga rw’amahina, ushyirwa muri Koruneri n’umunyezamu Thibaut Courtois.

Iminota 10 ya nyuma yaranzwe no gusatira cyane kwa Manchester City yashakaga kwishyura nibura igitego kimwe muri bitatu yari yatsinzwe ariko biranga. Umukino warangiye Real Madrid itsinze Manchester City ibitego 3-0, mu mukino ubanza wa ⅛ cya UEFA Champions League.

Mu yindi mikino yabaye, Paris Saint-Germain yatsinze Chelsea ibitego 5-2 byinjijwe na Bardely Barcola, Ousmane Dembele, Vitinha na Khvicha Kvaratskhelia watsinze bibiri, mu gihe Chelsea yatsindiwe na Malo Gusto na Enzo Fernandez.

Arsenal yanganyije na Bayern Leverkusen igitego 1-1, mu gihe FK Bodø/Glimt yatsinze Sporting ibitego 3-0, ibitego byashyizwemo na Sondre Fet ku munota wa 32, Ole Blomberg ku munota wa mbere w’inyongera kuri 45 y’igice cya mbere na Kasper Hogh ku munota wa 71. Imikino yo kwishyura iteganyijwe ku wa Kabiri, tariki ya 17 Werurwe 2026.

Ba uwa mbere mu kumenya amakuru agezweho!!!