Zira FK yo mu Cyiciro cya Mbere muri Azerbaijan ikinamo myugariro Mutsinzi Ange yasezereye FC DAC 1904 yo muri Slovakia iyitsinze ibitego 6-1 mu mikino ibiri, ibona itike yo gukina ijonjora rya nyuma mu yo gushaka itike y’Amatsinda ya UEFA Conference League.

Uyu mukino wabaye ku mugoroba wo Kane tariki ya 1 Kanama 2024, ubera muri Slovakia.

Mu mukino ubanza wabereye i Baku muri Azerbaijan, Zira FK yari yatsinze FC DAC 1904 Dunajská Streda yo muri Slovakie ibitego 4-0.

Zira FK yatangiye neza umukino maze ku munota wa 25 ifungura amazamu ku gitego cyatsinzwe na Raphael Utzig.

Mbere y’uko igice cya mbere kirangira FC DAC 1904 Dunajská Streda yabonye igitego cyo kwishyura maze amakipe ajya kuruhuka aganya igitego 1-1. 

Amakipe yombi avuye kuruhuka, Zira FK yongeye gutsinda ibitego bibiri ku munota wa 57 kivuye kuri Penaliti. 

Umukino warangiye Zira FK itsinze DAC 1904 Dunajská Streda ibitego 2-1 iyisezera ku giteranyo cy’ibitego 6-1 mu mikino ibiri yombi.

Mu ijonjora rya nyuma ryerekeza mu matsinda, Zira FK yatomboye Osiyek yo muri Croatia.

Umukino ubanza uzaba tariki 8 Kanama mu gihe uwo kwishyura uzaba tariki 15 Kanama 2024. 

Myugariro Mutsinzi Ange ukomeje kwisanga muri iyi kipe nshya, yakinnye iminota yose y’umukino.

Mu ntangiriro za Nyakanga uyu mwaka ni bwo Mutsinzi yerekeje muri Zira FK yasinyiye amasezerano y’imyaka itatu, avuye muri FK Jerv yo muri Norvège.

Mutsinzi ni umwe muri ba myugariro Ikipe y’Igihugu ‘Amavubi’ igenderaho. Yanyuze mu makipe nka AS Muhanga, Rayon Sports, APR FC ndetse na CD Trofense yo muri Portugal.