Sosiyete ya Uganda ikora ubwikorezi bwo mu kirere (Uganda Airlines) yatangaje ko igiye gutangiza ingendo za buri munsi zihuza Entebbe na Kigali, guhera ku wa 18 Ugushyingo 2026, mu rwego rwo koroshya ingendo hagati y’u Rwanda na Uganda no guteza imbere ubukerarugendo n’ubuhahirane.

Mu rwego rwo kwitegura gutangiza izo ngendo, Uganda Airlines iri kugirana inama nyunguranabitekerezo n’abakora mu rwego rw’ubukerarugendo n’ingendo mu Rwanda, igamije kubamenyesha serivisi zayo no kurebera hamwe amahirwe mashya azanwa n’iyo nzira.

Iyo nama yabereye i Kigali kuri uyu wa Kane tariki ya 12 Ugushyingo 2026, ku bufatanye bwa Uganda Airlines, Ambasade ya Uganda mu Rwanda n’Urwego rushinzwe guteza imbere ubukerarugendo muri Uganda (Uganda Tourism Board – UTB).

Yitabiriwe n’ibigo by’ubukerarugendo byo mu Rwanda, abakora umwuga wo gutegura ingendo n’ubukerarugendo (Tour Operators), abafatanyabikorwa batandukanye muri urwo rwego n’abandi bafitanye isano na rwo.

Abayitabiriye baganiriye ku mahirwe ashobora kuboneka mu rwego rw’ingendo n’ubukerarugendo, hashingiwe ku ngendo za buri munsi zigiye gutangizwa hagati y’imijyi ya Entebbe na Kigali.

Muri iyo nama, Uganda yanamuritse ibyiza nyaburanga byayo n’amahirwe ari mu bukerarugendo, hagamijwe kurushaho kuyimenyekanisha nk’Igihugu gishobora gukurura ba mukerarugendo baturutse mu Rwanda no mu bindi bihugu.

Michael Bulwaka, Umujyanama mu Biro bya Ambasaderi wa Uganda mu Rwanda, yagarutse kuri serivisi zitandukanye zitangwa na Uganda Airlines n’ibikorwa by’ubukerarugendo Uganda ifite, agaragaza ko iyi nama ari umwanya wo kumenyesha abafatanyabikorwa amahirwe azanwa n’izo ngendo nshya.

Itangizwa ry’izi ngendo rigiye kuba nyuma y’uko Uganda Airlines itangije ingendo zijya i Accra muri Ghana, rikaba ari igice cy’imbaraga z’iyi sosiyete zo kwagura ibikorwa byayo no kongera uburyo bwo guhuza ibihugu binyuranye.

Biteganyijwe ko ingendo za buri munsi za Entebbe-Kigali zizafasha koroshya ingendo z’abakora ubucuruzi, ba mukerarugendo n’abandi bagenzi, ndetse zikongera amahirwe y’ubufatanye mu bukungu n’ubukerarugendo hagati y’u Rwanda na Uganda.

Ba uwa mbere mu kumenya amakuru agezweho!!!