Mu mpera z’iki cyumweru gishize mu bihugu bitandukanye, imikino ya shampiyona yarakinwe nyuma y’ibyumweru bibiri idakinwa kubera imikino Mpuzamahanga y’ibihugu.

Uko ni nako bimeze ku bakinnyi b’Abanyarwanda bagiye gukina hanze y’u Rwanda bafashije amakipe yabo nubwo hari abo shampiyona zabo zitahiriye muri iyi minsi.

Ku wa Gatandatu tariki 30 Werurwe 2024 mu gihugu cya Ukraine shampiyona yarakomeje ku munsi wa 22 FC Kryvbas Kryvyi Rih ikinamo kapiteni Djihad Bizimana yatsinze Veres Rivne ibitego 2-0 muri uyu mukino yakinnye iminota yose y’umukino.

Muri Macedonia KF Shkupi ikinamo myugariro Rwatubyaye Abdul yatsinze varda ibitego 3-0 muri uyu mukino Rwatubyaye yakinnye iminota 82 nyuma yo guhabwa Ikarita ya kabiri y’umuhondo yamuviriyemo itukura asohorwa mu kibuga.

Mu gihugu cya Norvge Myugariro Mutsinzi Ange yakinnye umukino wa gicuti ikipe ye FC Jerve yo mu cyiciro cya kabiri yanganyije na Flekkeroy ibitego 2-2.

Bitenganyijwe ko iyi kipe izatangira shampiyona tariki 6 Mata 2024, ıkina na örn- Horten.

Nyuma yo kuva mu Ikipe y’Igihugu ‘Amavubi’, rutahizamu Nshuti Innocent yakomereje muri Leta Zunze Ubumwe z’Amerika gufatanya n’ikipe ye ya One Knoxville SC gukomeza intangiriro nziza za Shampiyona y’icyiciro cya gatatu.

Umukino wabaye ku wa Gatandatu, tariki ya 30 Werurwe wasize One Knoxville SC itsinze Tormenta FC igitego 1-0 ikomeza kuyobora Shampiyona nyuma y’iminsi itatu, Nshuti wabanje hanze ajyamo ku munota wa 60 nubwo nta gitego yabonye.

Impera z’icyumweru zisize amarira kuri Byiringiro Lague na Mukunzi Yannick bakınira ikipe  ya Sandvikens IF mu cyiciro cya kabiri yatsinzwe umukino ufungura shampiyona ibitego 4-0 Lague yinjiye mu kibuga ku munota wa 75 asimbuye mu gihe Yannick we atari mu bakinnyi bakoreshejwe.

Ni nako byagenze kuri St. Liège yo mu Bubiligi ikinamo Hakim Sahabo kuko yanyagiwe na KAA Gent ibitego 5-1 mu mukino uyu munyarwanda atagaragayemo.

Umunyezamu Maxime Wenssens ukinira Royale Union SG ntabwo ari mu bakinnyi yitabaje ku mukino ifitanye na Genk ku mugoroba wo kuri uyu wa Mbere, tariki ya 1 Mata 2024.

Manzi Thierry ukinira Al Ahli Tripoli muri Libya ari gufatanya n’abandi kwitegura umukino ukomeye w’igikombe kiruta ibindi muri icyo gihugu kizahuza ikipe ye na Al-Ittihad, ku wa Gatanu, tariki ya 5 Mata.